Бразилските власти соопштија дека најмалку шест лица загинале, а 750 се повредени во силно торнадо што го опустоши градот Рио Бонито до Игуасу на југот на земјата, предизвикувајќи огромни разурнувања на околу 300 километри од познатите водопади Игуасу.
Во само неколку минути, торнадото го пустошело градот со околу 14.000 жители во сојузната држава Парана, превртувајќи автомобили и уривајќи куќи.
Стотици повредени, девет во тешка состојба
Според најновите податоци од регионалните власти, шест лица се мртви, а меѓу 750 повредените, девет се во тешка состојба.
Пожарникари и спасувачки екипи од неколку соседни општини учествуваат во потрагата и укажувањето помош на настраданите.
Прогласена вонредна состојба
Владата на сојузната држава Парана прогласи вонредна состојба во Рио Бонито до Игуасу. Торнадото го погоди Бразил само неколку дена пред отворањето на климатската конференција COP30, што во понеделник ќе започне во градот Белем, на северот на земјата.
„Искрено сочувство до сите семејства што ги изгубија своите најблиски во торнадото,“ напиша бразилскиот претседател Луис Инасио Лула да Силва на платформата X (поранешен Твитер).
