Крајот на февруари носи вистинско пролетно изненадување за поголем дел од Европа и Балкан. Од југ продира топол воздушен бран, а истовремено регионот ќе биде под влијание на изразен топлотен антициклон – односно поле на висок воздушен притисок кое ќе услови стабилно, суво и сончево време.
Температурите во голем дел од европскиот континент ќе достигнуваат околу 20°C, додека во југозападните делови тие локално ќе се искачат и до 25°C. Токму таму се очекува да биде најтопло, со вредности невообичаени за овој период од годината.
Според проценките, температурите во многу земји ќе бидат повисоки од просекот за февруари за 10, па и повеќе степени – што претставува значително отстапување од вообичаените климатски услови.
Пролетни температури и во Македонија
И во Македонија крајот на февруари носи невообичаено топло време. Максималните дневни температури ќе се искачуваат близу 20°C, особено во Повардарието и во југоисточните предели од земјата.
Времето ќе биде стабилно, суво и со многу сончеви периоди. Сепак, утринските часови ќе останат релативно студени, со температури кои на повеќе места ќе се спуштаат неколку степени под нулата.
Сѐ на сѐ, пред нас е вистинско пролетно сценарио во средина на зима. Доколку ваквиот тренд продолжи подолго, можно е постепено будење на природата – порано цветање и активирање на вегетацијата, што дополнително ќе ја нагласи необичноста на овој топлотен бран.
