Топол туш веднаш по јадење може да изгледа како одличен начин за опуштање, но може да го попречи природниот процес на варење на храната. А може да предизвика и некои здравствени проблеми.
Имено, по јадење, телото се фокусира на варење на храната, што бара зголемен проток на крв во желудникот и во цревата. Крвта го доставува кислородот и хранливите материи коишто им се потребни на органите за варење за ефикасно разградување на храната. Колку повеќе крв се насочува кон стомакот, толку подобро функционира дигестивниот систем.
При туширањето, од топлината се прошируваат крвните садови, особено во близина на кожата, односно крвта повеќе се насочува кон површината на телото за да го излади. Ова може да ја намали количината на крв достапна за варење, пренасочувајќи ги ресурсите подалеку од желудникот и од цревата. Како последица на тоа, дигестивниот систем може да не функционира толку ефикасно, што доведува до побавно разградување на храната. Дополнително, кога телото е изложено на топлина, ги релаксира мускулите, вклучувајќи ги и оние во дигестивниот тракт. Ова може да ја намали брзината со која се обработува храната и може да се појави и надуеност.
