Најновите истражувања покажаа дека климатската криза трипати го зголеми времетраењето на океанските топлотни бранови. Смртоносните бури се интензивираат, а клучните екосистеми како што се шумите со морска трева и коралните гребени се уништуваат.
Половина од океанските топлотни бранови од 2000 година не би се случиле без глобалното затоплување, кое е предизвикано од согорувањето на фосилни горива. Тие бранови не само што станаа почести, туку и поинтензивни – тие се во просек за 1°C потопли, а на некои места значително повеќе, според научниците.
Ова истражување е првото сеопфатно испитување на влијанието на климатската криза врз топлотните бранови во светските океани и открива длабоки промени.
Потоплите океани исто така апсорбираат помалку јаглерод диоксид, што потоа дополнително ги зголемува температурите.
„Тука во Медитеранот имаме топлински бранови во морето кои се за 5°C потопли“, вели д-р Марта Маркос од Медитеранскиот институт за напредни студии на Мајорка, која го водеше истражувањето.
„Ужасно е кога ќе влезеш во вода за да пливаш. Како да си во супа“, додаде таа.
Покрај уништувањето на подводните екосистеми како што се морските треви, Маркосова истакна дека потоплите океани даваат повеќе енергија на силните бури што го погодуваат брегот и копното.
Поради глобалното затоплување, веројатноста за формирање на таква бура беше пет пати поголема бидејќи температурите во Медитеранот се искачија на 5,5°C. Ова доведе до повеќе водена пареа и со тоа повеќе врнежи.
„Единственото решение е да се намали согорувањето на фосилните горива. Тоа е многу јасна врска. Повеќе од 90 проценти од дополнителната топлина заробена од стакленички гасови се складира во океаните. Ако престанете да ја загревате атмосферата, ќе престанете да ги загревате и океаните“, додаде научникот.
Неодамнешните големи морски топлотни бранови вклучуваат исклучително долг настан во Пацификот во 2014-15 година. година, што предизвика масовна смрт на морскиот свет.
Интензивна топлина го погоди Тасманското Море во 2015-16 година, со рекордни температури на морето регистрирани во водите на Велика Британија и Средоземното Море во 2023 година. Во 2019 година, научниците предупредија дека топлотните бранови во океаните брзо се зголемуваат и убиваат морски организми како „пожари што уништуваат големи шумски површини“.
Д-р Зои Џејкобс, од Националниот океанографски центар на Велика Британија, рече дека океанските топлотни бранови претставуваат значителен ризик за општеството – при што некои поединечни настани предизвикуваат милиони долари загуби поради влијанијата врз риболовот, аквакултурата и туризмот. Тие се поврзани и со зголемени топлотни бранови на копно и екстремни временски настани како што се урагани и бури.
Студијата, објавена во списанието „Зборник на трудови на Националната академија на науките“, користела модел на температури на површината на морето од 1940 година, кој го отстранил ефектот од климатската криза.
Потоа ги споредиле тие модели со реалните мерења од океаните за да покажат како глобалното затоплување влијаело врз зголемувањето на температурите. Тие се фокусираа на летните топлотни бранови, бидејќи тогаш температурите го достигнуваат својот максимум и предизвикуваат најголема штета.
Анализата покажа дека во 1940-тите имало околу 15 дена екстремна топлина годишно на површината на океанот, додека денес глобалниот просек е речиси 50 дена годишно. Некои региони, вклучувајќи го Индискиот Океан, тропскиот Атлантик и западниот Пацифик, доживуваат до 80 дена топлотни бранови годишно – односно секој петти ден.
Морињата во тропските предели се веќе топли, па дополнителната топлина генерално го продолжува времетраењето на топлотните бранови. Во постудените мориња, оваа топлина може значително да ја зголеми нивната јачина, како што е случајот со Средоземното и Северното Море.
Д-р Сјангбо Фенг од Универзитетот во Рединг, кој беше дел од истражувачкиот тим, рече: „Со оглед на тоа што глобалните температури продолжуваат да растат, океанските топлотни бранови ќе стануваат почести и потешки. Човековите активности фундаментално ги променија нашите океани. Потребна е итна климатска акција за заштита на морските екосистеми.“
