Еден од најголемите електронски музички фестивали во светот, Tomorrowland, го објави првиот дел од програмата за своето издание во 2026 година. Фестивалот ќе се одржи во белгискиот град Бум за време на два викенда, од 17 до 19 и од 24 до 26 јули 2026 година.
Според најавата, повеќе од 500 артисти ќе настапат на вкупно 16 сцени, а годинашното издание ќе се одвива под темата „Consciencia“, која фестивалот ја претстави неодамна.
На главната сцена се најавени имиња како David Guetta, Martin Garrix, Armin van Buuren, Hardwell, Dimitri Vegas & Like Mike, како и Fisher, Miss Monique, John Summit, Chase & Status и Marlon Hoffstadt.
Atmosphere сцената ќе биде резервирана за потврди и потешки електронски звуци, со настапи на Sara Landry, I Hate Models, Nico Moreno, NOVAH, Shlømo и други.
Фестивалот најави и бројни b2b настапи, меѓу кои DJ Tennis b2b Vintage Culture, Dimitri Vegas b2b Timmy Trumpet, Avalon Emerson b2b Ben UFO и HAAi b2b The Blessed Madonna.
Меѓу најзабележителните моменти од програмата е и деби-настапот на Calvin Harris на Tomorrowland, како и специјалниот сет „Tribute to Belgium: Cherry Moon“, посветен на белгиското електронско музичко наследство. Дополнително, во 2026 ќе биде претставена и нова сцена фокусирана на deep и Afro-house звук.
Организаторите најавија дека листата не е конечна, а публиката веќе може да се пререгистрира за купување билети.
