Градоначалникот на Крива Паланка, Сашко Митовски, истакна дека присутното загадување е далеку над дозволените вредности, повикувајќи на итна реакција од надлежните институции.
„Анализите покажуваат дека водата во Крива Река спаѓа во највисоката класа на загаденост, V класа, што значи дека е токсична и не може да се користи за ниту една намена. Загрижува присуството на тешки метали како олово, кадмиум и цинк, чии концентрации значително ги надминуваат дозволените граници“, изјави Митовски.
Според резултатите, концентрацијата на олово во водата изнесува 36,65 микрограми на литар, што е скоро четири пати повеќе од максимално дозволеното ниво. Нивото на кадмиум е повеќе од 20 пати над дозволеното, додека водата содржи и енормни количества манган и цинк. Дополнително, матноста на водата е 170 NTU, што е многу повеќе од дозволените 10, а количината на суспендирани материи е над 7.876 микрограми на литар – повеќе од 120 пати над дозволеното.
Градоначалникот го оспори тврдењето на компанијата „Булмак 2016“, која управува со рудникот „Тораница“, дека хаваријата во нивниот рудник нема никаква врска со загадувањето. „Не е јасно како компанијата тврди дека нивниот рудник не е виновен, кога анализите јасно покажуваат присуство на токму оние метали што се користат во нивниот процес“, изјави Митовски.
Општината веќе поднела кривична пријава, а Митовски побара од Јавното обвинителство да постапи веднаш.
„Очекуваме брза и соодветна реакција од институциите за да се спречи натамошно еколошко уништување“, додаде тој.
Локалните еколошки организации предупредуваат дека загадувањето може да има катастрофални последици за биодиверзитетот и водниот екосистем. Ако не се преземат итни мерки, Крива Река може да стане мртва река.
