На денешен ден, 23 март 1998 година, епскиот филм Titanic на режисерот Џејмс Камерон влезе во историјата на филмот кога освои рекордни 11 Оскари на 70-тата доделување на наградите, изедначувајќи се со класикот Ben-Hur од 1959 година.
Церемонијата во Лос Анџелес се претвори во незаборавна вечер поради огромниот успех на оваа епска драма, која ја спојува љубовната приказна со трагедијата на потонувањето на најпознатиот брод во историјата.
Главните ликови се Роуз Девит Букатер, млада британска аристократка што патува кон Америка, и Џек Доусон, сиромашен уметник кој освоил карта за Titanic на покер. Нивната љубовна приказна се развива во драматичниот контекст на судирот со ледениот брег во 1912 година.
Titanic беше номиниран во 14 категории, а меѓу освоените Оскари се и оние за најдобар филм, режија, оригинална музика, монтажа и визуелни ефекти.
Режисерот Џејмс Камерон и младите актери Леонардо Ди Каприо и Кејт Винслет добија најмногу пофалби од критичарите, иако не освоија Оскари за глума. Публиката и критичарите беа согласни дека станува збор за ремек-дело што го промени стандардот на филмската продукција и постави нови граници во користењето на специјални ефекти.
Филмот постигна и неверојатен финансиски успех, заработувајќи повеќе од 2 милијарди долари ширум светот, што го направи филм со најголема заработка до 2009 година, кога рекордот го собори Avatar, исто така на Камерон.
Песната My Heart Will Go On, изведена од канадската пејачка Селин Дион, освои Оскар за најдобра оригинална песна и стана еден од најпознатите филмски хитови на сите времиња.
Децении по премиерата, Titanic продолжува да се смета за еден од најголемите филмови во историјата на кинематографијата, не само поради рекордниот број Оскари и финансискиот успех, туку и поради емотивната приказна која продолжува да го освојува срцето на новите генерации.
