Унгарската опозициска партија Тиса го претстави својот изборен програм во пресрет на парламентарните избори закажани за 12 април, најавувајќи сериозен политички и економски пресврт во земјата. Програмата вклучува воведување данок на имот за најбогатите граѓани, прифаќање на еврото како официјална валута и јасно зацврстување на унгарската надворешна политика кон Европската Унија и НАТО.
Со оваа платформа, Тиса директно се позиционира како најсериозна закана за владејачката партија Фидес и премиерот Виктор Орбан, кој е на власт од 2010 година.
Партијата ја предводи Петер Маѓар, кој најавува системска борба против корупцијата и деблокирање на замрзнатите европски фондови, со цел да се поттикне економскиот раст и да се врати довербата на институциите во Брисел. Според програмата, лицата со имот поголем од 3,1 милион долари би плаќале годишен данок од еден процент на богатството над таа граница, додека за граѓаните со приходи под просечната плата се предвидува намалување на даночниот товар.
Во енергетскиот дел, Тиса најавува постепено намалување на зависноста од руските енергенси до 2035 година и удвојување на уделот на обновливи извори на енергија до 2040 година. Истовремено, се најавува и изградба на нуклеарна централа, со дополнителна ревизија на проектот „Пакш 2“, кој моментално е планиран со руска поддршка.
Програмата вклучува и реформи во здравството, образованието, социјалната и детската заштита, како и подобрување на јавниот превоз – области кои, според опозицијата, со години се запоставени поради клиентелизам и политичка контрола.
Со јасна проевропска реторика и нагласено дистанцирање од Москва, Тиса се обидува да го мобилизира незадоволството кај граѓаните и да понуди алтернатива на долгогодишниот модел на владеење на Орбан. Дали ова ќе биде доволно за политичка промена, ќе покаже изборниот резултат во април.
