Новите истражувања потврдуваат дека количината на сон има огромно влијание врз вниманието и когнитивните способности на децата, а дури и разлика од само еден и пол час може да биде значајна, пишува Mind Body Green.
Сон – клучен за мозокот во развој
Сонот е еден од најмоќните алати за одржување на здравјето на мозокот, без разлика на возраста. Кај децата и тинејџерите, чиј мозок сè уште е во развој, квалитетниот одмор не е само прашање на регенерација, туку е од суштинско значење за учењето и менталната енергија.
Истражувањето го испитувало влијанието на должината на спиењето врз когнитивните функции кај деца и млади на возраст од 10 до 23 години.
Помалку сон – послаб фокус и побавни реакции
Учесниците биле поделени во три групи кои четири последователни ноќи спиеле различно време: 10 часа, 8,5 часа и 7 часа.
Резултатите покажале дека спиењето само 7 часа предизвикува значително намалување на контролата на вниманието и когнитивната флексибилност. Психомоторната будност – односно брзината и доследноста на реакциите на визуелни стимули – исто така опаднала со намалувањето на спиењето.
Најголемиот пад бил забележан кај групата која спиела 7 часа во споредба со онаа која спиела 8,5 часа. Иако работната меморија не била значително погодена, научниците предупредуваат дека тоа не е причина за занемарување на сонот.
Интересно е што возраста на учесниците не влијаела многу на резултатите, што значи дека и постарите тинејџери имаат потреба од доволно сон за да ја задржат менталната острината.
Едноставна формула за подобар успех
Заклучокот е јасен: повеќе време поминато во сон значи подобра мозочна функција, особено во однос на вниманието и менталната агилност.
Додека повеќето возрасни имаат потреба од 7–8 часа сон, ова истражување нè потсетува дека мозоците во развој бараат повеќе. Иако е предизвик да се убеди дете или тинејџер да легне порано, дури и мали промени во рутината можат значително да ја подобрат концентрацијата и успехот на училиште.
