ТикТок соопшти дека направил промени во своите внатрешни операции за да ги заштити романските гласачи од мешање на претседателските избори во мај, објавија локалните медиуми, повикувајќи се на еврокомесарката за дигитални технологии и иновации, Хена Виркунен.
– Промените вклучуваат подобро откривање и означување на профили со политичка содржина, како и ангажирање на неколку романски експерти кои работат конкретно на разоткривање тајни кампањи за влијание, појасни таа.
Пред европратениците од Комисијата за внатрешен пазар и заштита на потрошувачите, Виркунен изјави дека социјалната мрежа вложила напори да осигури дека случувањата од изборите во Романија во ноември 2024 година нема да се повторат.
Ова соопштение доаѓа откако Европската комисија започна истрага против платформата кон крајот на минатата година, како и по незадоволството на европратениците од одговорите на претставниците на ТикТок за време на сослушување во Европскиот парламент. Конечните резултати од истрагата ќе бидат презентирани пред изборите во мај.
– Првичните резултати што Комисијата веќе ги објави укажуваат на илјадници лажни профили од Турција и пошироко. Има индикации дека ќе има последици за компанијата ТикТок, изјави романскиот европратеник Николае Штефануца, заменик-претседател на Европскиот парламент.
Тој објасни дека во случај на одлука за казна, која би била процент од прометот на ТикТок во ЕУ, Европската комисија има овластување да ја спроведе. Казната може да достигне до шест проценти од прометот на компанијата, прецизира Штефануца.
Романските медиуми потсетуваат дека во март ТикТок, Мета, Гугл и Твитер биле поканети да учествуваат на „стрес-тест“ организиран од Националниот орган за администрација и регулација во комуникациите (ANCOM). Тестот имаше за цел да ја провери способноста на учесниците во изборниот процес брзо да се справат со потенцијални онлајн предизвикателства за време на изборите.
Пред неколку дена, ТикТок достави извештај до Европската комисија, признавајќи дека претседателските избори во Романија биле манипулирани во корист на независниот кандидат Калин Ѓорѓеску. Претставниците на кинеската платформа открија дека над 27.000 лажни профили биле користени за поддршка на предизборната кампања на крајнодесниот „Сојуз за обединување на Романците“ и на Калин Ѓорѓеску.
И покрај овие сознанија, истрагата на Главното обвинителство досега се фокусира исклучиво на активностите на Калин Ѓорѓеску на ТикТок, коментира агенцијата Медиафакс. На 27 јануари, обвинителството побара соработка од турските власти за истрага на „фарма за тролови“, за која се тврди дека придонела за онлајн промоцијата на Ѓорѓеску. Според информациите, таа создала над 20.000 лажни профили на социјалната мрежа, генерирајќи повеќе од 2,1 милиони коментари за промовирање на Ѓорѓеску, почнувајќи од 23 ноември 2024 година, непосредно пред првиот круг на претседателските избори.
Алгоритмот на ТикТок ја зголемува видливоста на профилите споменати во голем број коментари, што доведе до засилено присуство на Ѓорѓеску на платформата.
Првиот круг на изборите во Романија во ноември минатата година беше поништен врз основа на разузнавачки извештаи (вклучително од сојузнички држави), кои покажаа дека Русија влијаела врз гласачите преку социјалните мрежи за да го поддржат екстремистичкиот кандидат Калин Ѓорѓеску. Тој стана многу популарен на ТикТок непосредно пред изборите. Во декември, Европската комисија започна истрага за улогата на кинеската платформа, проверувајќи дали таа го прекршила Законот за дигитални услуги (DSA) на ЕУ, кој регулира незаконска содржина, транспарентност на финансирањето на рекламите и дезинформации во однос на проценката на ризик и фер избори. Според DSA, платформите со над 45 милиони активни корисници во ЕУ се обврзани да ги ублажат ризиците поврзани со изборните процеси, истовремено заштитувајќи ги основните права и слободата на изразување.
