Социјалната мрежа Threads, во сопственост на Meta, за првпат го надмина X (поранешен Twitter) по бројот на дневно активни корисници на мобилни уреди, покажуваат најновите податоци на аналитичката компанија Similarweb.
Според анализата, на почетокот на јануари Threads имал околу 141,5 милиони дневно активни корисници на iOS и Android, додека X бележел приближно 125 милиони мобилни корисници. Ова претставува значаен пресврт по речиси три години од лансирањето на платформата на Meta.
Како што пренесува TechCrunch, Threads го престигнал X уште кон крајот на октомври или почетокот на ноември 2025 година, како резултат на континуиран раст на корисничката база. Аналитичарите наведуваат дека овој раст не е директно поврзан со поновите контроверзии околу вештачката интелигенција на X, туку претставува подолгорочен тренд.
И покрај тоа, X сè уште има силна позиција на американскиот пазар, иако бројот на неговите дневно активни мобилни корисници во САД е речиси преполовен во споредба со минатата година.
Сосема поинаква слика се забележува кога станува збор за веб-верзиите на двете платформи. Податоците од 13 јануари покажуваат дека X привлекува околу 145,4 милиони дневни веб-посетители, додека Threads има само 8,5 милиони. Ова укажува дека X и понатаму доминира на десктоп, додека Threads засега е значително посилен на мобилни уреди.
Иако Meta може да биде задоволна од растот на Threads, експертите оценуваат дека ќе биде потребно уште време за платформата да се доближи до X и во веб-сегментот.
