Фестивалот беше отворен во присуство на Заменик министерката за економија, култура и иновации, како и Државниот министер за млади, а Плоштадот беше исполнет со забава, музички настапи, конференции, креативни панели и директни интеракции со преку 100 претставници на водечки музички компании.
На затворањето, фестивалот беше опишан како момент во кој е напишана нова историја во полето на музиката, уметноста и културната индустрија, со јасна визија за поттикнување на креативноста и растот на сцената преку глобално поврзување.
Терапија, како платформа посветена на промоција на културата и современата музичка сцена, беше горд претставник на македонската урбана култура на Muse-X. Освен медиумско покривање на настанот, Терапија доби клучна улога и како дел од жирито на DJ Академијата Tirana, каде заедно со реномираниот хрватски артист Петар Дундов и продуцентот Давор Попивода, го избраа победникот кој ќе настапи на отворањето на главниот настан.
„Културата е темелот на идентитетот на една држава. Таа ја обликува заедничката меморија, вредностите, традициите и јазикот и служи како мост меѓу генерации. Кога една држава инвестира во културата, уметноста, музиката, театарот, литературата и архитектурата, таа не само што ја чува својата историја, туку гради и иднина исполнета со креативност, критичко мислење и дух на заедништво,“ – изјавија од Терапија.
Терапија со своето присуство ја зацврсти позицијата како активен играч во регионалната културна мрежа, градејќи мостови меѓу младите уметници и новите можности на меѓународната сцена.
