Американските берзански индекси S&P 500 и Nasdaq во средата (8 октомври 2025) достигнаа нови рекордни нивоа, поттикнати од продолжениот раст на технолошкиот сектор и еуфоријата околу договори поврзани со вештачката интелигенција (AI). Индексот Nasdaq порасна за 1,12% и достигна 23.043 поени, додека S&P 500 се зголеми за 0,58% и заврши на 6.753 поени. Dow Jones остана речиси непроменет, на 46.601 поен.
Овие достигнувања ја потврдуваат доминацијата на технолошките компании на берзата, особено на оние кои се активно вклучени во развој на AI и автоматизација.
„Главната тема останува агресивниот раст, бидејќи постојано стигнуваат нови вести за договори и партнерства поврзани со AI,“ изјави Бил Мерц, директор на инвестициски стратегии во U.S. Bank Wealth Management.
Улогата на вештачката интелигенција
Компании како NVIDIA, Alphabet, Microsoft и Amazon продолжуваат да привлекуваат инвеститори со објави за нови партнерства, инфраструктурни проекти и продукти поврзани со вештачката интелигенција. Дури и мали компании од секторот бележат ненадеен скок на вредноста, во сенка на оваа технолошка револуција.
Овој ентузијазам е поддржан и од влезот на големи хеџ фондови и институционални инвеститори кои ја гледаат AI не само како технолошки, туку и како економски двигател за цела деценија.
Поделени ставови во ФЕД: Намалување на каматите или пауза?
Иако берзите растат, финансиската позадина е сложена. Зписникот од последната седница на американската централна банка (ФЕД) открива длабока поделба во однос на идната монетарна политика.
Дел од членовите сугерираат дека слабеењето на пазарот на труд бара натамошно намалување на каматните стапки, додека други остануваат претпазливи поради тоа што инфлацијата останува над целните 2%.
Во септември, ФЕД ги намали каматите за 0,25 процентни поени, и според аналитичарите, можно е до крајот на годината да следуваат уште две такви намалувања. Но, недостигот на нови економски податоци – поради блокада на федералните институции – ја отежнува проценката.
„Главната дилема е колку агресивно треба да се дејствува – дали ФЕД претерува или заостанува во реакцијата,“ коментира Закари Хил од Horizon Investments.
Политички застој и економска неизвесност
Финансиската нестабилност дополнително се продлабочува поради осумдневниот застој во работата на американските федерални служби, откако Конгресот не успеа да се договори за ново финансирање. Според аналитичарите, оваа блокада би можела да се продолжи и следната недела, што ќе влијае врз достапноста на важни економски индикатори.
Раст и во Европа
И европските берзи ја следат оваа позитивна динамика. Во средата:
- Лондонскиот FTSE 100 порасна за 0,69%
- Франкфуртскиот DAX за 0,87%
- Парижкиот CAC 40 за 1,07%
Овие индекси го одразуваат глобалниот оптимизам, иако геополитичките и монетарните ризици остануваат актуелни
И покрај глобалната политичка и економска неизвесност, технолошкиот сектор и вештачката интелигенција го носат пазарот напред, додека ФЕД сè уште калкулира со своите потези. Останува прашањето – дали е ова стабилен тренд или берзански балон?
