„Театар е жив само кога е дел од заедницата. Затоа ја напуштаме сцената и се придружуваме на оние кои бараат промена. Театар е место на вистината, слободата и емпатијата, а веќе месеци, вистината, слободата и емпатијата се блокирани на факултетите и на протестите низ цела Србија“, напишаа актерските ансамбли во заедничкото соопштение.
„Глумачките ансамбли на белградските театри – Народното позориште во Белград, Театарот Ателе 212, Белградското драмско позориште, Театарот „Бошко Буха“, Малиот театар „Душко Радовиќ“, Театарот на Терезије, Југословенското драмско позориште како и Драмата на Српското народно позориште од Нови Сад, вработените во Театарот на млади, Нови Сад, поголемиот дел од колективите на Новосадско позориште, ансамблот на Народното позориште во Сомбор и Народно позориште „Тоша Јовановиќ“ во Зрењанин, се единствени во ставот дека е неопходно да го прекинат работниот процес и да започнат седмодневен штрајк“, се наведува во соопштението.
Тие додале дека за прв пат во историјата на српските театри, се одлучуваат за ваков чин, прифаќајќи ги повиците на студентите за борба за работа на институциите и одговорен однос кон својата дејност, свесни дека веќе децении присуствуваме на урнувањето на сите, па и културните институции на ова општество.
„Студентите нè потсетија на одговорноста и ни дадоа охрабрување за самоорганизација за да започнеме активно учество во создавањето на подобро општество, внатре во своите струки и институции во кои работиме“, напишале во соопштението.
Во соопштението исто така навеле дека ја изразуваат целосната солидарност со студентите и безусловно ги поддржуваат сите нивни барања.
„Нивната борба за правда, безбедност, право на слободно изразување и достоинствен живот е борба за сите нас. Преземаме апсолутна поддршка и за сите граѓани кои веруваат дека оваа наша земја може да биде посреќно и поправедно место. Знаеме дека нашата публика е меѓу нив“, се додава.
