Неделата на гордоста започна на 5 јуни во Косово. Во текот на целата недела, од понеделник до сабота беа организирани различни активности, насочени кон подигање на свеста кај граѓаните за правата на ЛГБТИ заедницата и негување на почитувањето на нивните слободи.
На парадата присуствуваа и градоначалникот на Приштина Перпарим Рама, парламентарци, амбасадори и членови на граѓанското општество.
Демонстрантите вееја знамиња со виножито, танцувајќи и пеејќи по улиците на Приштина.
Покрај Парадата, се одржаа и улични акции со цел да се пренесе неделната порака до граѓаните на Косово. Оваа година, фокусот беше ставен на важноста на борбата против стигматизацијата на менталното здравје и промовирање на социјалното прифаќање на ЛГБТИ поединците, повикувајќи ги јавните институции да учествуваат.
Минатата година, мотото на парадата беше „Во државата и во семејството“, со цел да го одрази присуството и негирањето на постоењето на ЛГБТИ индивидуите и во државата и во семејството.
Претседателката на Косово, Вјоса Османи, изјави дека Неделата на гордоста е одлична можност да се разговара за важноста од заштита на правата на секој член на косовското општество и справување со предизвиците со кои се соочуваат.
„Косово постигна напредок во унапредувањето на правата на ЛГБТИ поединците и тие се вградени во нашиот Устав. Сега повеќе од кога било, нашите напори имаат за цел да покажеме дека сме посветени на еднакво општество“, рече Османи на прес-конференцијата на свеченото отворање на Неделата на гордоста.
Меѓутоа, во февруари минатата година, активистите за човекови права и ЛГБТИ го изразија својот гнев откако косовскиот парламент не го усвои нацрт-граѓанскиот законик, главно поради член што би го отворил патот за легализација на истополовите заедници. Со 28 гласа „за“, 28 „против“ и четири воздржани, Собранието не го изгласа предлог-граѓанскиот законик.
Во 2017 година, активистите и сојузниците на ЛГБТК+ заедницата на Косово за прв пат го прославија првиот марш на гордоста во земјата, со мотото „Во име на љубовта“.
