Генералниот директор на Светската здравствена организација (СЗО), Тедрос Адханом Гебрејесус, соопшти дека се предвидува повеќе од 100.000 деца, како и околу 37.000 бремени жени и доилки во Појасот Газа, да страдаат од акутна неухранетост до април следната година.
Неговата изјава следува по извештајот на агенциите на Обединетите нации за интегрираната класификација на фазите на безбедност на храната, во кој се предупредува дека најмалку 1,6 милиони луѓе во Газа ќе се соочат со високо ниво на акутна несигурност со храна до средината на април 2026 година.
Гебрејесус предупреди дека, во најлошите сценарија – вклучително и обновување на конфликтот и целосен прекин на хуманитарната помош – целиот Појас Газа би можел да се соочи со ризик од глад до април наредната година.
Во објава на социјалната мрежа Икс (X), тој истакна дека напредокот постигнат во спречувањето на гладот останува исклучително кревок, бидејќи населението и понатаму се соочува со масовно уништување на инфраструктурата, колапс на средствата за егзистенција и локалното производство на храна, како и со сериозни ограничувања во хуманитарните операции.
Во исто време, само околу 50 проценти од здравствените установи во Газа се делумно функционални и се соочуваат со недостиг од основни медицински материјали и опрема, кои честопати се предмет на сложени процедури за влез и строги ограничувања, наведе тој.
Со цел да се забрза спасувањето животи и да се прошири пристапот до здравствена грижа, СЗО повикува на итно одобрување за влез на основни медицински резерви и опрема за болниците во Газа, порача Гебрејесус.
