Во следните денови во Европа се очекува да бидат забележани повеќе случаи на мајмунски сипаници, предупредува Светската здравствена организација, откако во Шведска беше откриен првиот случај на овој опасен вирус надвор од Африка.
Потврдата на поттипот mpox Clade 1b во Шведска ја потврдува поврзаноста на светот и дека болеста лесно може да се пренесе од едниот на другиот крај на светот.
„Веројатно во европскиот регион во наредните неколку денови и недели ќе бидат забележани и дополнителни случаи“ наведуваат од СЗО.
Како што претходно објавивме, mpox, порано познати како мајмунски сипаници, се пренесува преку близок контакт, вклучувајќи сексуален однос, контакт кожа со кожа, како и преку близок разговор или дишење. Болеста предизвикува симптоми слични на грип, кожни лезии, и во некои случаи може да биде фатална, со стапка на смртност од 4%.
Во моментов, постојат повеќе епидемии на mpox кои се одвиваат паралелно, а делумно се предизвикани од поновиот и посериозен тип Clade 1b, идентификуван во септември минатата година. Првиот случај на Clade 1b во Шведска го привлече вниманието на здравствените власти ширум светот.
Додека Clade 2 предизвика вонредна состојба во јавното здравје во 2022 година, таа беше релативно блага со околу 300 случаи идентификувани во Шведска.
