Во нов извештај се наведува дека од вкупно 167.376 повредени од октомври 2023 година, една четвртина имаат трајни трауми. Повеќе од 5.000 луѓе биле подложени на ампутации, а десетици илјади се со сериозни повреди – над 22.000 на екстремитетите, повеќе од 2.000 со повреди на ’рбетниот столб, околу 1.300 со повреди на главата и повеќе од 3.300 со тешки изгореници.
„Овие повреди создаваат огромна потреба од специјализирана хирургија и рехабилитација, но истовремено длабоко ги менуваат животите на пациентите и нивните семејства“, соопшти СЗО, нагласувајќи дека една четвртина од овие случаи се однесуваат на деца.
Здравствениот систем на Газа, кој и пред војната беше преоптоварен, денес е на работ на колапс. Само 14 од 36 болници се делумно функционални, а помалку од една третина од претходните рехабилитациски центри продолжуваат да работат.
„Ниту една служба не е целосно оперативна, а недостигот од специјализиран кадар е драматичен“, стои во извештајот. Од приближно 1.300 физиотерапевти и 400 други терапевти пред војната, денес останале активни само мал дел, меѓу кои и осум протетичари за илјадниците ампутации.
СЗО предупредува дека повредите не се само физички, туку оставаат и длабоки психолошки трауми. „Преживеаните се борат со траума, загуба на најблиските и секојдневни предизвици, додека психосоцијалната поддршка останува крајно ограничена“, наведува организацијата.
„Медицинските установи мора да бидат заштитени, треба да се обезбеди непречен пристап до гориво и медицински залихи, а ограничувањата за увоз на основна опрема да се укинат“, повикува СЗО, додавајќи: „Пред сè, неопходен е итен прекин на огнот. Народот на Газа заслужува мир, здравје и шанса за опоравување.“
Извор: N1info.rs
