Тој изјави дека е потребно драстично зголемување на меѓународната хуманитарна помош за да се ублажи кризата која го оптоварува населението на Појасот Газа, и покрај прекинот на огнот меѓу Израел и Хамас од 10 октомври.
„Глад, огромен број повредени, распаднат здравствен систем, ширење на болести и уништена санитарна инфраструктура – тоа е фатална комбинација,“ изјави д-р Гебрејесус. „Оваа ситуација е катастрофална и ќе остави последици што ќе се чувствуваат со генерации.“
Според СЗО, над 68.000 лица се убиени во израелските напади од почетокот на конфликтот во октомври 2023 година. Израел, пак, тврди дека ги интензивира испораките на медицински и хуманитарни средства, но нивото на помош е далеку под потребното.
Д-р Гебрејесус нагласи дека секојдневно во Газа пристигнуваат само 200 до 300 камиони со помош, иако се потребни најмалку 600 дневно за да се покријат основните потреби на населението. Тој повика Израел да ја „раздели хуманитарната помош од политичките услови“ и да овозможи неограничен пристап за сите организации на терен.
Во моментот, илјадници Палестинци чекаат евакуација поради итна медицинска потреба, но летовите се прекинати веќе две недели. „Над 700 пациенти досега починале чекајќи транспорт,“ изјави Гебрејесус, додавајќи дека е неопходно да се обноват медицинските летови и да се дозволи влез на опремата за теренски болници, која често се конфискува на граница.
СЗО проценува дека за обнова на здравствениот систем во Газа ќе бидат потребни околу 7 милијарди долари, или 10% од вкупната вредност на проектот за реконструкција на територијата.
„Мирот е најдобриот лек,“ заврши Гебрејесус. „Но и покрај прекинот на огнот, некои луѓе кои славеа дека војната завршила денес се веќе мртви. Тоа е најтажниот доказ за кревкоста на ситуацијата.“
Извор: BBC
