Во знак на загриженост од неговите изјави, британскиот министер за здравство ги предупреди граѓаните да не обрнуваат „апсолутно никакво внимание на тоа што Трамп зборува за медицина“.
Трамп во понеделникот им порача на трудниците да избегнуваат употреба на ацетаминофен (познат како Tylenol во САД), додека истовремено предупреди дека родителите треба да ги одложат или избегнуваат некои вакцини за нивните деца, што експертите го оценуваат како опасно за јавното здравје.
Светската здравствена организација (СЗО) потврди дека вакцините спасуваат животи и дека нема научни докази дека тие предизвикуваат аутизам. Портпаролот на СЗО, Тарик Јашаревиќ, истакна дека доказите кои поврзуваат употреба на парацетамол во бременост со аутизмот се „несигурни и непостојани“.
Регулаторите во Велика Британија, Европската агенција за лекови и Австралија исто така ги отфрлија тврдењата, потврдувајќи дека парацетамолот е безбеден за употреба во бременост и нема докази за поврзаност со нарушувања на развојот на мозокот кај децата.
Шпанската министерка за здравство, Моника Гарсија, ги оцени изјавите на Трамп како „негирање на науката“ кое го загрозува јавното здравје.
Стручњаците потенцираат дека зголемувањето на дијагнозите за аутизам во САД е резултат на пошироко дефинирање на состојбата и зголемената свест кај родителите, а не на употребата на лекови или вакцини.
Истражувањата покажуваат дека парацетамолот е безбеден кога се користи во најниска можно потребна доза и само за најкратко време, како што препорачуваат медицинските експерти.
Извор: The Guardian
