Феноменот Ел Нињо е во тек и ќе биде „барем умерен“ по јачина, според Светската метеоролошка организација. Според Обединетите нации, временскиот феномен Ел Нињо, кој предизвикува повисоки глобални температури, ќе продолжи во текот на 2023 година.
Новото ажурирање на Светската метеоролошка организација (СМО) прогнозира дека има 90% веројатност настанот Ел Нињо да продолжи во втората половина на 2023 година.
Ел Нињо е природна климатска појава која обично се поврзува со зголемена топлина ширум светот, како и со суша во некои делови од светот и обилни дождови на други места.
„Почетокот на Ел Нињо во голема мера ќе ја зголеми веројатноста за рушење на температурни рекорди и предизвикување поекстремна топлина во многу делови од светот и во океанот“, рече генералниот секретар на СМО, професорот Петри Таалас.
„Прогласувањето на Ел Нињо од страна на СМО е сигнал до владите ширум светот да ги мобилизираат подготовките за ограничување на влијанијата врз нашето здравје, нашите екосистеми и нашите економии“. Тој истакнува дека раните предупредувања и активности за планирање на екстремните временски настани поврзани со овој голем климатски феномен се од витално значење за да се спасат животи и средства за живот.
Од 2020 година, светот е погоден од исклучително долгата Ла Ниња – спротивниот феномен на Ел Нињо, која го лади светот и која заврши претходно оваа година.
Сепак, ОН соопштија дека изминатите осум години биле најтоплите досега забележани и покрај тоа што ефектот на ладење на Ла Ниња се протега на речиси половина од тој период. Без тој временски феномен, затоплувањето можеше да биде уште полошо.
Вилфран Муфоума-Окиа е шеф на регионалните услуги за предвидување на климата во Светската метеоролошка организација.
„Влијанието на настанот Ел Нињо врз глобалните температури веројатно ќе ја зголеми глобалната температура бидејќи Ел Нињо ќе додаде антропогено затоплување кое ќе донесе до повисоки темеператури“, рече тој.
Додека во некои делови на планетата ќе генерира сериозни суши, во други ќе предизвика поројни дождови и поплави.
ОН ги повика владите ширум светот да ги предвидат последиците од доаѓањето на Ел Нињо.
Извор: Euronews
