Светот во јули сфати како ќе изгледа летото со глобално затоплување од 1,5 степени Целзиусови – прагот под кој треба да остане планетата, предупредуваат научниците, а до кој е се поблиску во последните години.
Просечната глобална температура во јули, најтоплиот месец досега, била за околу 1,5 степени Целзиусови потопла од прединдустриската ера која заврши на крајот на 19 век, објави во вторник службата за климатски промени на Европската унија Коперник.
Соопштението следи по серијата смртоносни топлотни бранови и неверојатни температурни рекорди на неколку континенти, како и невидена топлина во океаните ширум светот. Научниците од Коперник велат дека првиот летен месец кој надмина 1,5 степени нуди увид во идните лета, пишува CNN.
Прагот од 1,5 степени е значаен бидејќи научниците го сметаат за клучен пресврт за планетата, по што шансите за екстремни горештини, поплави, суши, шумски пожари и недостиг на храна и вода ќе станат уште понеповолни за животот каков што го знаеме. Тоа е целта што научниците ја поставија со Парискиот договор од 2015 година за да ја минимизираат штетата од климатската криза, истовремено давајќи им на општеството и економијата време да се одвикнат од фосилните горива што ја загреваат планетата.
Научниците се особено загрижени дека глобалната температура долгорочно ќе остане над 1,5 степени. До 2022 година, светот се загреал за околу 1,2 степени.
„Иако пробивањето на прагот од 1,5 степени на дневно, неделно или месечно ниво не е исто како и пробивањето на долгорочниот просек, важно е да се следи колку често и колку долго го надминуваме тој праг. Како што температурите продолжуваат да растат, ефектите ќе станат потешки“, рече Ребека Емертон, научник од Коперник.
Во последните неколку години стана јасно дека светот веќе ги чувствува алармантните ефекти од климатската криза, за која многумина не се подготвени. Ако планетата продолжи да се загрева, истакнува Емертон, светот ќе се соочи со уште поекстремни временски услови од тоа што го гледаме.
„Ги видовме влијанијата што ваквите настани веќе ги имаат врз луѓето и на нашата планета, така што секое мало затоплување е значајно“, рече Емертон.
Според Berkeley Earth, непрофитна организација за следење на животната средина, имало само 10 други месеци кои биле потопли од 1,5 степени Целзиусови над историскиот просек, а последниот е март 2023 година. Пред тоа, другите месеци кои беа за 1,5 степени потопли од прединдустриските времиња се случуваа во зима или рана пролет.
Роберт Род, водечки планетарен научник во Berkeley, вели дека прагот од 1,5 степени првпат бил надминат во јули, а нешто вакво никогаш досега не се случило за време на летото на северната хемисфера.
„Иако минатите зими беа невообичаено топли, набљудувањето на екстремната топлина во лето веројатно ќе има подиректно влијание врз животите на луѓето. Покачувањето од 1,5 степени прави блага зима, но може да доведе до невидени екстреми во текот на летото“, рече Род.
Иако Род рече дека е веројатно дека 2023 година ќе биде најтоплата година досега, малку е веројатно дека годината како целина ќе биде 1,5 степени потопла од прединдустриското време: „Годишниот просек е сè уште под 1,5 степени и мислиме дека е малку е веројатно дека остатокот од 2023 година ќе биде доволно топол за годишниот просек да биде над 1,5“.
Научниците од Коперник забележаа дека светот може да доживее повеќе од овие невидени температурни промени додека Ел Нињо продолжува да се развива.
„Дури и ако климатската криза не се забрза, туку продолжи на нејзината сегашна траекторија, ќе имаме повеќе денови, недели, месеци и години на рекордни температури и други влијанија врз системот. Мораме да направиме се што можеме за да ги намалиме емисиите и да ги ограничиме идните затоплувања“, рече Емертон.
Извор: Index.hr
