Со настанот насловен како „Светот ја слави поезијата. Градот ја слуша“, утре ќе биде одбележан Светскиот ден на поезијата.
Поетско-музичката вечер, тематски посветена на поезијата за патот, ќе се одржи на 18 март (среда), со почеток од 19 часот, во едукативниот културен центар „Лабораториум“ во Скопје а на настанот свои читања ќе имаат 30-тина современи и афирмирани македонски поети и поетеси од сите генерациии.
Програмата ќе биде надополнета со музичка програма од современи македонски музичари.
„Патот е важна одредница на сите поети – и општочовечкиот и поетскиот, автореференцијалниот. Секој поет уште од своите почетоци се труди да се издвои по својот стил – односно да го најде својот автохтон пат во поезијата. Тој пат е и примамлив и неизвесен, бара длабење во најдлабокото, но и остар увид во површното, секојдневното. На тој начин, поезијата може да се сфати и како пат кон себе, но и како пат кон другиот, а поетот станува патник упатен кон растајнување на непознатото. Притоа, патот за поетот не е цел сама по себе, туку е суштествена потреба на духот, израз на поривот што за смисла не прашува’“, вели поетесата Виолета Танчева-Златева, која подготвува „Антологија на патот“ од современата македонска поезија.
Беседа по повод Светскиот ден на поезијата ќе одржи младата поетеса Ивана Јовановска, а настанот ќе го модерира поетесата и новинарка Александра Спасеска.
Музичкото интермецо меѓу стиховите ќе го изведе Зарина Првасевда, а настанот ќе го заокружат „Поетроника“, кои со своите иновативни звуци ќе ја продолжат забавата до самото затворање.
