Во индискиот град Њу Делхи, во октомври минатата година, полицијата заплени повеќе од 560 килограми кокаин и околу 40 килограми хидропонска марихуана. Вредноста на запленетите супстанции е најголемата досега и изнесува околу 669 милиони долари, при што следеа апсења на шверцери и дилери поврзани со меѓународен нарко картел.
Следните денови полицијата запленила дополнителни 208 килограми кокаин, скриени во вреќи со чипс и други прехранбени производи во изнајмена продавница.
Истиот месец, при заедничка операција спроведена од страна на државната полиција на Делхи и Гуџарат беа запленети 518 килограми кокаин, во вредност од 595 милиони долари, откриени во фармацевтска компанија во Гуџарат. Операцијата беше дел од поголема истрага која откри нарко картел.
„Познат е фактот дека Индија отсекогаш била центар за шверц (на дрога), но бројот на патишта за шверц се зголемија, а методите на шверц станаа пософистицирани“, изјави за ДВ, поранешниот комесар за наркотици, Ромеш Бхатачарџи
„Иако е невозможно да се потврдат точните бројки, се проценува дека за секој килограм запленета дрога, остануваат во оптек десет или повеќе килограми“, додаде Бхатачарџи.
Според проценките на различни безбедносни агенци, вкупната вредност на запленетатс дрога во 2024 година достигнала 1,07 милијарди долари. Но, експертите велат дека тоа би можело да биде само ‘врвот на ледениот брег’. Поранешниот генерален директор на Националната академија за царини, индиректни даноци и наркотици, Шрикумар Менон, за ДВ изјави дека моменталната ситуација дава алармантна слика за огромните количини на дрога што влегува во Индија.
Од транзитен центар до добавувачи и потрошувачи
Според Даночната разузнавачка служба, транспортот на кокаин по воздушен пат стана доминантен метод за шверц на овој скап наркотик.
„Шверцерите често кријат дрога во багажот, користат пакети или луѓе кои голтаат дрога. Заедно со кокаинот, има и пораст на шверцот на метамфетамин, особено во североисточните држави како Асам и Мизорам“, се вели во извештајот на ДРИ.
Посебно загрижувачки тренд, нагласен во извештајот, е појавата на „црн кокаин“, нова форма на дрога што иследниците тешко ја откриваат.
Таквиот кокаин е хемиски третиран со супстанции како што е јагленот за да се камуфлира неговиот карактеристичен мирис и на тој начин да се оневозможи откривањето на дрогата.
„Постојано сме пред предизвик од пософистицираните методи на шверц, кои влијаат на светските трендови, како и на злоупотребата на напредните технологии“, вели за ДВ анонимен извор од ДРИ.
Меѓу потрошувачите има се поголем број на деца
„Има забележливо зголемување на употребата на кокаин кај генерацијата Z, поттикнато од зголемената куповна моќ“, вели Менон.
„Кокаинот е скапа дрога, а зголемувањето на бројот на корисници на оваа дрога укажува на промена на животни навики и преференции. Анализата на пазарот покажа и дека корисниците на кокаин користат и метамфетамини“, додава поранешниот генерален директор на Националната академија за царина, оданочување и наркотици.
Министерството за социјална правда и зајакнување во 2018 година процени дека во Индија има 23 милиони корисници на дрога, што е 600 отсто зголемување од 2004 година.
Хероинот, кристал мет, синтетичките дроги и хидропонската марихуана се наркотици кои се повеќе ги консумираат младите луѓе, што дополнително ја поттикнува растечката домашна побарувачка.
Низ земјава е забележан зголемен број домашни лаборатории за производство на метамфетамин, што исто така укажува на загрижувачки тренд на злоупотреба на оваа дрога.
Извештајот доставен до индискиот парламент во 2023 година откри алармантни бројки поврзани со злоупотреба на дрога во државата Пенџаб, особено кај децата. Во извештајот се наведува бројка од 6,6 милиони корисници на дрога во Пенџаб, од кои речиси 697.000 се деца на возраст од 10 до 17 години. Меѓу нив, 343.000 деца користат наркотични дроги (вклучувајќи хероин), 18.100 користат кокаин, а околу 72.000 се консументи на други видови дроги.
Кон крајот на 2024 година, Агенцијата за контрола на наркотици и полицијата во Делхи открија тајна лабораторија за производство на метамфетамин во Голема Ноида, поврзана со мексикански нарко картел. Запленети се околу 95 килограми метамфетамин, како и разни хемикалии и опрема за производство на дрога.
