Обидот на Австрија да ја спречи Европската унија да ги класифицира нуклеарната енергија и природниот гас како „одржливи“ извори за целите на инвестициските шеми во рамките на ЕУ беше отфрлен од Судот на ЕУ во средата.
Судот оцени дека вклучувањето на овие два извори во таксономијата на ЕУ претставува „постепена“ мерка која овозможува „безбедност на снабдувањето“.
Австрија, традиционално противник на нуклеарната енергија, ја поднесе тужбата против Европската комисија во октомври 2022 година. Меѓутоа, Општиот суд во Луксембург застана на страната на Европската комисија, оценувајќи дека не ги надминала своите овластувања со вклучувањето на нуклеарната енергија и фосилниот гас во шемата за одржливи инвестиции.
Ова значи дека одредени активности во секторите на нуклеарната енергија и фосилниот гас можат да бидат класифицирани како придонесувачи за ублажување или адаптација кон климатските промени.
Таксономијата на ЕУ претставува „зелен прирачник“ кој ги води инвеститорите, компаниите и владите во однос на тоа кои економски активности се навистина еколошки. Овие правила стапија во сила во јули 2020 година со цел да се намали климатското влијание, загадувањето и т.н. „greenwashing“.
„Комисијата имаше право да заклучи дека нуклеарната енергија има речиси нула емисии на стакленички гасови,“ истакна Судот, додавајќи дека Европската комисија земала предвид доволно информации за ризиците поврзани со нормалното работење на нуклеарните централи, можноста за сериозни несреќи и високо-радиоактивниот отпад.
Со обврските на ЕУ за намалување на емисиите за 55% до 2030 година и постигнување климатска неутралност до 2050 година, како и дискусиите за целите за 2040 година, Судот исто така ја зема предвид и моменталната недостапност на доволно алтернативи (како ветерни и соларни централи) на неопходно ниво за сигурно и континуирано снабдување со енергија.
Леоноре Гевеслер, лидерка на Зелените во австрискиот парламент, остро реагираше: „Оваа пресуда испраќа катастрофален сигнал до целата ЕУ. Ако оваа одлука остане, ќе се уништи основниот принцип – каде што пишува зелено, повеќе нема да биде зелено. Тие што сакаат зелено, ќе добијат нуклеарна енергија или валкан гас.“
Како тогашен министер за клима во 2022 година, Гевеслер ја поднесе тужбата, тврдејќи дека законот ќе отвори врата за зелено перење („greenwashing“) на климатски штетни и опасни технологии.
„Нуклеарната енергија е опасна, скапа и остава зад себе високо радиоактивен отпад што трае стотици илјади години. Таа не е решение за климатската криза – таа создава нови опасности. Секое евро вложено во скапи реактори е евро помалку за вистинските решенија – соларна, ветерна, водена и геотермална енергија,“ додаде Гевеслер.
