Во текот на ноќта кон 7 февруари, во центарот на Солун избија сериозни судири меѓу полицијата и групи демонстранти, откако лица излегле од Политехничкиот факултет при Универзитетот „Аристотел“ и фрлале молотови коктели кон единици на полицијата за разбивање немири. Инцидентите прераснаа во повеќечасовна полициска операција со употреба на солзавец, зашеметувачки гранати и водени топови.
Според информации од грчките медиуми, судирите започнале по 2 часот по полноќ, при што еден полицаец бил повреден и пренесен во болница со изгореници на главата и вратот. Во нападите биле оштетени и повеќе паркирани автомобили во близина на факултетот.
По ескалацијата, полицијата интервенирала со цел растерување на толпата, а операцијата траела до раните утрински часови. Главниот градски булевар „Егнатија“ бил затворен за сообраќај речиси шест часа, што предизвикало сериозен застој и парализа на централното градско подрачје.
Меѓу повредените, според официјалните информации, била и 21-годишна девојка, која побарала медицинска помош поради респираторни проблеми како последица од употребата на хемиски средства.
Телевизијата „Скај“ јави дека немирите избувнале за време на забава во просториите на Политехничкиот факултет, на која, според нивните наводи, присуствувале лица поврзани со анархистички групи. Надлежните служби привеле повеќе од 300 лица, а истрагата за настаните и одговорноста за нанесената штета сè уште е во тек.
Ноќните судири повторно ја отворија јавната дебата во Грција за безбедноста околу универзитетските кампуси и за начинот на справување со насилни инциденти во урбани средини, додека јавноста очекува институционален одговор за приведените и за последиците од немирите.
