Федерален судија во САД отвори сериозни сомнежи околу одлуката на владата да ја стави на црна листа компанијата за вештачка интелигенција Anthropic, оценувајќи дека потегот наликува на обид за нејзино „парализирање“.
Судијката Рита Ф. Лин, која го води случајот во федералниот суд во Сан Франциско, изјави дека постои загриженост оти владата можеби ја казнува компанијата поради нејзиното јавно несогласување со државната политика.
Судир со Пентагон
Спорот започнал откако Пентагон и администрацијата на претседателот Доналд Трамп ја прекинале соработката со Anthropic. Причината е одбивањето на компанијата да дозволи неограничена воена употреба на својот AI модел „Claude“.
Меѓу спорните точки се користење автономно оружје без човечки надзор и масовен надзор врз граѓани
По ова, владата ја означи компанијата како „ризик за националната безбедност“ и им наложи на федералните агенции да престанат да го користат нејзиниот софтвер.
Две тужби против владата
На 9 март, Anthropic поднесе две тужби барање за преиспитување на одлуката за „безбедносен ризик“, тужба дека администрацијата го прекршила правото на слобода на говор
Судијката Лин истакна дека владата има право да избира со кои технологии ќе работи, но го постави клучното прашање: дали забраната е законска или претставува одмазда.
Страв од опасен преседан
Компјутерскиот научник Бен Герцел предупреди дека случајот може да има сериозни последици за целата индустрија.
„Ако оваа одлука остане, тоа ќе ги обесхрабри компаниите да ѝ се спротивставуваат на владата“, изјави тој.
Тој додава дека ваквата ознака обично се користи за странски компании, а не за домашни технолошки фирми, што го прави случајот уште поконтроверзен.
Што следува?
Судијката најави дека одлуката дали привремено ќе се суспендира забраната ќе биде донесена во наредните денови.
Исходот од случајот може да стане преседан што ќе ја дефинира границата меѓу државната безбедност и слободата на технолошките компании – особено во ерата на брз развој на вештачката интелигенција.
