Организаторите предупредија дека станува збор за системско уривање на универзитетот и нарушување на академските права.
Собирот започна пред Државниот универзитет во Нови Пазар, по што учесниците маршираа низ градските улици и протестот го завршија на Градскиот плоштад. Настанот помина мирно и без инциденти, со ограничено присуство на полицијата. За време на протестот беа одржани форуми и говори на студенти и професори, како и обраќања на гости од други универзитети во Србија. Во текот на денот накратко беа блокирани и одредени градски и автопатски правци, по што учесниците мирно се разотидоа.
Претседателот на Србија, Александар Вучиќ, протестот го оцени како мал по бројност и без значење. Тој изјави дека собирот бил „исклучително мал“ и дека, според него, немал суштинско политичко влијание, додавајќи дека единствениот ефект бил зголемена потрошувачка во угостителските објекти поради доаѓањето луѓе од други градови.
Од друга страна, лидерот на движењето Почни-Промени, Саво Манојловиќ, оцени дека студентите во Нови Пазар испраќаат порака за обединување и солидарност. Тој нагласи дека протестот покажал поинаква слика за Србија, општество засновано на различност, меѓусебна почит и заедничка борба за функционални институции, наспроти, како што наведе, политиките што се темелат на поделби.
Протестот во Нови Пазар повторно го отвори прашањето за состојбата во високото образование и односот на институциите кон студентите и универзитетскиот кадар, тема која во наредниот период се очекува да остане во фокусот на јавноста.
Извор: Мета.мк
