Дијана Хрка, мајката на Стефан, кој загина лани при падот на бетонската настрешница железничката станица во Нови Сад, денеска го поддржа предлогот на автопревозникот Миломир Јаќимовиќ за блокада на Белград, повикувајќи ги жителите на Нови Сад да одговорат на тој повик.
На прес-конференција во Белград, Дијана Хрка објави дека ќе разговара со Јаќимовиќ во текот на вечерта и истакна дека е среќна што тој и неговиот син го прекинаа штрајкот со глад во Нови Сад.
„Го поддржувам неговиот план за блокада, но сепак ќе преговараме. Конечно треба да се обединиме, да се собереме под еден шатор и да испланираме како и што ќе правиме следно“, рече таа и изјави дека Јаќимовиќ треба да дојде во Белград в сабота.
„Ајде сите да се согласиме што треба да правиме. Тој најави блокади и јас сум за тоа, блокада до 48 часа“, рече Дијана Хрка и изјави дека се чувствува добро. Таа престојува во шатор во близина на српскиот Парламент, кој го нарекува свој „втор дом“.
Таа го прекина штрајкот со глад пред два дена, најавувајќи продолжување на својата борба.
Штрајкот со глад го прекина и автопревозникот Миломир Јаќимовиќ, но тој се уште е пред зградата на покраинскиот парламент во Нови Сад со две барања – да му се вратат автобусите и да се поништат казните што му се изречени.
По девет дена, Миломир Јаќимовиќ синоќа го прекина штрајкот со глад со порака дека ќе остане пред „Бановина“ до петок и дека, доколку автобусите не му бидат вратени, ќе ги повика граѓаните да одат во Белград и ќе ѝ се придружат на Дијана Хрка пред српското Собрание.
Студентите што го блокираа белградскиот Факултет за драмски уметности ги повикаа граѓаните да им се придружат в сабота, 22 ноември на протест со што ќе ја одбележат годишнината од нападот врз нивни студенти по што следеа блокади на факултетите низ цела Србија. Во кратка објава на Инстаграм, тие го посочија местото на средбата и пораката „Една година, исто барање“.
