Струмичкиот карневал годинава ќе обедини над 1.000 учесници, со 30 маски од Македонија и 11 маски од странство во рамки на главната интернационална поворка закажана за 21 февруари. Програмските активности траат до 25 февруари, а манифестацијата повторно ја става Струмица во центарот на карневалските случувања во земјава.
Струмичкиот карневал се смета за еден од најзначајните традиционални обичаи од ваков вид во Македонија. Неговите корени се поврзуваат со верскиот празник Тримери, а првите пишани извори за постоењето на карневалската традиција во Струмица се среќаваат во записите на турскиот патописец Евлија Челебија. Од 1994 година, Струмица е членка на меѓународната асоцијација на карневалските градови FECC.
Претседателката на Организацискиот одбор, Танкица Стојанова, вели дека карневалот е традиција што има посебно место кај струмичани и претставува дел од идентитетот на градот под Царевите Кули. Таа посочува дека карневалската недела не е само манифестација, туку обичај што секоја година се одбележува на највисоко ниво.
Годинава, покрај традиционалната поворка, програмата вклучува и нови содржини. За првпат ќе биде изведен мјузиклот „Аладин и волшебната ламба“ на македонски јазик, во кој учествуваат 130 деца и млади. Во петок е предвидена изложба на тема „Карневалот – танц на бојата и радоста“, со учество на ученици од прво до деветто одделение.
По завршувањето на интернационалната поворка, на централната бина на плоштадот „Гоце Делчев“ ќе настапи диџејот Кирил Џајковски. Според организаторите, годинава има зголемен број пријавени маски, како и групи што повторно се враќаат по неколкугодишна пауза.
За главната поворка се пријавени над 1.000 учесници, а за детскиот карневал што ќе се одржи во недела се очекуваат над 600 деца. Организаторите посочуваат дека зголемениот интерес го потврдува значењето на карневалот како културна и традиционална манифестација.
Општина Струмица е главен покровител на настанот, а од општинскиот буџет годинава се издвоени 3,7 милиони денари. Поддршка има и од Министерството за култура и туризам, како и од компании што учествуваат во организацијата.
Главната интернационална поворка ќе се одржи на 21 февруари, а програмата ќе продолжи со низа активности до 25 февруари. Организаторите очекуваат голем број гости од земјава и од странство.
