Со голем број учесници, маски и посетители, во Струмица официјално започна традиционалниот Струмички карневал, кој се одржува по повод празникот Прочка. Централните улици на градот ќе бидат исполнети со карневалски групи и публика, откако синоќа се одржа и Интернационалното карневалско дефиле.
На Интернационалното карневалско дефиле настапија 39 групи од земјава и странство, а карневалските креации привлечоа големо внимание кај присутните. Настапите беа придружени со маски, бои и музика, а повеќе од 1.000 учесници ги поминаа улиците на Струмица во придружба на публика.
Дефилето го означи кралот на карневалот со зборовите „Време е, нека почне Струмичкиот карневал“, по што започна традиционалната поворка. Најпрво настапија струмичките мажоретки, а потоа во дефилето се вклучија гостите од странство.
Посебно внимание привлече групата „Блескавите пеперутки“ од Шумен, Бугарија, чиј настап беше поздравен од публиката. Следуваше маската „Игра на снегулките“ од Основното училиште „Сандо Масев“ од Струмица. Претставничката на групата по настапот изјави дека нивната маска носи пораки за радост, љубов, среќа и промена.
Впечаток кај посетителите остави и маската „Цветина свадба“ на Гимназијата „Јане Сандански“ од Струмица. Претставник на групата појасни дека преку сценската претстава се потсетуваат на македонската традиција и порачаа на значењето на слогата меѓу луѓето.
Карневалските креации ги оценува жири-комисија која ќе ги избере најдобрите во повеќе категории, а за победниците се предвидени парични награди.
На дефилето присуствуваа бројни гости од земјава и странство, меѓу кои и потпретседателот на Собранието Антонио Милошоски, како и претседателот на FECC, Ларс Алгел.
Карневалските свечености продолжуваат и денеска, на празникот Прочка, со традиционалниот Детски карневал, на кој младите струмичани ќе продефилираат со своите маски низ градските улици.
