Основното јавно обвинителство (ОЈО) Струга отвори предмет по информациите за сериозно загадување на водата за пиење во градот, со цел да се утврдат причините и евентуалната кривична одговорност за дела против животната средина и здравјето на луѓето.
Од Обвинителството информираат дека во координација со Одделението за внатрешни работи (ОВР) Струга при МВР, издадена е наредба до правосудната полиција да изврши увид на локацијата во селото Шум – каде што се наоѓаат изворите од кои Струга се снабдува со вода за пиење.
Во увидот, како што се наведува во соопштението, треба да присуствуваат и надлежните инспекциски служби од областа на животната средина, Агенцијата за храна и ветеринарство (АХВ), како и Центарот за јавно здравје (ЦЈЗ).
Од ОЈО Струга посочуваат дека во текот на постапката ќе се преземат и други дејствија за проверка на состојбата и за прибирање докази.
Водата забранета за употреба
Во меѓувреме, водата од струшкиот водовод од неделата е забранета за секаква употреба – и за пиење и за основни животни потреби – поради екстремно висока заматеност.
Според Институтот за јавно здравје – Охрид, мострите земени на 9 февруари покажале матност од 28,56 NTU, што е значително над дозволените вредности.
Од ЈП „Водовод и Канализација“ – Струга со кратко соопштение информираа дека водата во градот и околината не е безбедна и дека до ново известување не треба да се користи.
Поширок еколошки контекст
Случајот повторно го отвора прашањето за состојбата со водната инфраструктура во регионот. Проблемите со колекторскиот систем и излевањето отпадни води во Охридското Езеро со години се предмет на јавни реакции, особено во туристичките сезони.
Сега, фокусот е ставен на изворот Шум и квалитетот на водата што стигнува до домовите на стружани. Од исходот на истрагата ќе зависи дали станува збор за природна појава, инфраструктурен пропуст или евентуално кривично дело со последици врз јавното здравје.
Граѓаните во меѓувреме остануваат без основната потреба – безбедна вода за пиење – додека институциите ја утврдуваат одговорноста.
