Околу 500 вработени во Канцеларијата на Високиот комесар за човекови права на Обединетите нации (OHCHR), предводена од Волкер Тирк, побарале официјално прогласување на војната во Газа за геноцид. Во писмо до Тирк, кое агенцијата Reuters го доби на увид, се наведува дека конфликтот меѓу Израел и Хамас, кој трае речиси две години, ги исполнува правните критериуми за геноцид, со оглед на обемот и природата на злосторствата.
„OHCHR има голема правна и морална одговорност да ги осуди геноцидните злосторства“, се вели во писмото. „Ако не го стори тоа, се доведува во прашање кредибилитетот на Обединетите нации и целиот систем за заштита на човековите права.“
Како пример се наведува неуспехот на ОН да спречат геноцидот во Руанда во 1994 година, кога беа убиени повеќе од еден милион луѓе.
Во моментот нема официјален коментар од израелското Министерство за надворешни работи. Израел досега ги отфрлаше обвинувањата за геноцид, повикувајќи се на правото на самоодбрана по нападот на Хамас на 7 октомври 2023 година, во кој беа убиени 1.200 луѓе и киднапирани 251, според израелски извори.
Од тогаш започнатиот воен конфликт во Појасот Газа, според тамошното Министерство за здравство, загинале речиси 63.000 луѓе. Меѓународни организации предупредуваат дека дел од населението е изложено на глад.
Претставници на ОН и во минатото изјавуваа дека само меѓународните судови имаат мандат да утврдат дали се случил геноцид.
