Европскиот форум Алпбах претставува една меѓународнa платформa која повеќе децении обединува студенти, млади професионалци, академици, носители на одлуки и експерти од различни области. Секоја година, во алпското село Алпбах во Австрија, се отвора простор за дијалог и размена на идеи за клучни европски и глобални прашања. Форумот трае две недели, од 24 август до 4 септември 2026 година, a oвогодинешната тема на Форумот е „Како Европа победува?“, тема која ги повикува учесниците да размислуваат за иднината на Европа, нејзините предизвици и можностите за заеднички напредок.
Еден од најважните сегменти на Форумот е Стипендиската програма, која овозможува учество на млади луѓе на возраст од 18 до 30 години. Преку оваа програма, избраните учесници добиваат пристап до академски семинари, тематски дискусии и разговори со водечки експерти и носители на политики.
Апликациите за Стипендиската програма на Европскиот форум Алпбах се отворени во периодот од 2 до 22 март 2026 година. Повеќе информации за програмата и условите за аплицирање се достапни на официјалната веб-страница на Европскиот форум Албах.
За многумина млади луѓе, учеството на Форумот претставува искуство кое значајно влијае на нивниот професионален и личен развој. Ана Софеска, стипендистка од 2024 година, го опишува своето искуство како незаборавно:
„Алпбах беше место каде што младите луѓе отворено разговараат за иднината на Европа и за тоа како можеме да придонесеме кон поправедно и поодржливо општество. Освен академските дискусии, најсилен впечаток ми остави енергијата на младите учесници, нивната самодоверба, знаење и подготвеност да ги споделат своите идеи.“
Според неа, посебна вредност имаат и семинарите, каде учесниците работат на практични задачи и сценарија кои ги поврзуваат теоријата и реалните предизвици во општеството. „Тоа беше искуство кое ми помогна да видам како изгледа мојата професија во пракса и ме поттикна да размислувам поотворено и похрабро“, додава таа.
Искуството на Форумот го истакнува и Ана Марија Наумовска, стипендистка од 2025 година, која нагласува дека Алпбах претставува простор за критичко размислување и визионерски идеи за Европа.
„Европскиот форум Алпбах обединува млади луѓе од целиот свет со лидери од политиката, науката, бизнисот и културата. Токму таа размена на идеи и перспективи создава чувство дека навистина можеме да придонесеме кон градење на посилна и подемократска Европа“, вели Наумовска.
Македонија на Форумот е претставена преку Клуб Алпбах Македонија, национално здружение кое повеќе од две децении активно работи на промовирање на вредностите на дијалогот, демократијата и меѓународната соработка. Клубот претставува платформа за поврзување на младите луѓе со експерти, институции и организации, како и за поттикнување на нови иницијативи и партнерства.
Учеството на македонските стипендисти на Форумот не се ограничува само на присуство на предавања и дискусии. Тие често се вклучуваат и како организатори и модератори на настани, со што активно придонесуваат во разговорите за европската иднина. Истовремено, преку културни настани и активности како Меѓународниот базар, тие ја претставуваат македонската култура и традиција пред учесници од целиот свет.
По завршувањето на Форумот, стипендистите остануваат активни во рамките на Клуб Алпбах Македонија, организирајќи настани, дискусии и иницијативи со кои го пренесуваат духот на Алпбах и во локалната заедница. На тој начин, искуството од Форумот продолжува да живее и да инспирира нови генерации млади луѓе.
Отворањето на апликациите за Стипендиската програма претставува можност за младите од Македонија да станат дел од оваа глобална мрежа на идеи, знаење и соработка. Европскиот форум Алпбах, како што велат и самите учесници, не е само академски настан, туку и место каде се создаваат нови перспективи, пријателства и иницијативи кои имаат потенцијал да влијаат врз иднината на Европа.
За сите прашања и дополнителни информации, посетете гo официјалниот профил на Клуб Алпбах Македонија.
