Британскиот премиер Кир Стармер и кинескиот претседател Си Ѓинпинг утринава одржаа билатерален состанок во Големата народна сала во Пекинг, кој траеше околу еден час и дваесет минути. Средбата доаѓа во чувствителен момент за односите меѓу Обединето Кралство и Кина, кои во последните години минуваат низ периоди на застој и политички тензии.
Ова е нивна прва целосна билатерална средба по ноември 2024 година, кога накратко разговараа на маргините на самитот на Г20 во Бразил.
На почетокот на разговорите, Си Ѓинпинг оцени дека односите меѓу Кина и Обединетото Кралство во последните години биле нестабилни. „Односите меѓу Кина и Обединетото Кралство поминаа низ одредени застои и пресврти што не им служеа на интересите на нашите земји“, рече Си, опишувајќи го светот како „турбулентен и променлив“.
Тој нагласи дека подлабокиот дијалог меѓу двете земји е неопходен – и за глобалниот мир и стабилност, и за економиите и граѓаните на двете држави.
„Ангажманот со Кина е неизбежен“
Кинескиот претседател порача дека ангажманот со Кина е „неизбежен“ и дека долгорочната перспектива е клучна.
„Добрите работи бараат време и напор. Сè додека нешто е исправно и им служи на темелните интереси на нашите земји и народи, треба да имаме долгорочна визија“, рече Си, додавајќи дека двете страни мора да ги надминат разликите и да градат меѓусебна почит.
Тој истакна дека доколку Лондон и Пекинг успеат да ги надминат несогласувањата, ќе можат „да го издржат тестот на историјата“, цитирајќи и кинеска поговорка за гледање „далеку, преку големи растојанија“.
Стармер: Потребен е пософистициран однос
Кир Стармер ја опиша Кина како „клучен глобален актер“ и изрази желба за „пософистициран“ и пофункционален однос меѓу двете земји.
„Кина е клучен играч на глобалната сцена и од витално значење е да изградиме пософистициран однос“, рече британскиот премиер, нагласувајќи дека надворешната политика директно влијае врз секојдневието на британските граѓани – од цените до чувството на безбедност.
Фокус на трговијата и инвестициите
И Лондон и Пекинг најавија можност за потпишување договори за трговска и инвестициска соработка за време на посетата, што би означило прв чекор кон „ресетирање“ на економските односи по неколку години застој.
Се очекува најавите да се фокусираат на сектори како зелена енергија, фармацевтска индустрија, здравство, креативни индустрии, финансии и образование. Според извори запознаени со разговорите, можни се и кинески инвестиции во британската автомобилска индустрија, преку користење на недоволно искористени производствени капацитети.
Конкретни резултати и визи за иднината
Подоцна, за време на посетата на Забранетиот град, Стармер изјави дека средбата била продуктивна и дека се постигнати „реални и конкретни резултати“. Тој посочи напредок во разговорите за царините на вискито, можностите за безвизно патување во Кина и соработката околу нерегуларната миграција.
Според податоци од Даунинг стрит, повеќе од 60 отсто од моторите за мали чамци запленети од криумчарски мрежи минатата година биле произведени во Кина, тема која исто така била отворена на разговорите.
Средбата меѓу Стармер и Си се гледа како обид за постепено стабилизирање на односите меѓу Обединетото Кралство и Кина, по години обележани со недоверба, спорови околу човековите права и безбедносни прашања. Иако конкретните договори ќе бидат важни, дипломатските извори посочуваат дека обновувањето на редовниот директен дијалог е клучно за идните економски и политички односи.
