Истражувачите од Универзитетскиот колеџ во Лондон (UCL) следеа околу 4.000 луѓе на возраст од 50 и повеќе години, во периодот од 2012 до 2023 година. Тие користеа податоци од истражувањето за да ја измерат среќата, задоволството од животот и евдемонската благосостојба на луѓето – чувство за цел и смисла во животот, како и симптоми за депресија.
Според наодите објавени во списанието Aging & Mental Health, менталната благосостојба на постарите луѓе опаднала, а нивоата на депресија се зголемиле кон крајот на 2020 година. Но, состојбата многу бргу се сменила. Од крајот на 2021 година до 2023 година менталната благосостојба на постарите Британци драстично се подобрила.
Наодите би можеле да „одразуваат обновена благодарност за социјалните врски и значајните активности, како и зголемената психолошка отпорност по период на неволја“, рече во изјавата Паола Заниното, водечки автор на студијата и професор по медицинска и социјална статистика на UCL.
Пред пандемијата, 11,4% од постарите возрасни лица доживеале значителни депресивни симптоми, ниво кое се искачи на 27,2 отсто кон крајот на 2020 година, а потоа падна на 14,9 % од 2021 до 2023 година. Истражувачите теоретизираа дека ова може да се должи на последователните ефекти од прекинатата медицинска нега и други услуги за постарите луѓе за време на пандемијата.
Но, не сите ги искористија придобивките од бумот на менталното здравје по пандемијата. Возрасните во нивните 50-ти години и помалку богатите луѓе пријавиле дека се во полоша состојба од нивните постари и побогати врсници – веројатно затоа што нивото на нивната благосостојба веќе било пониско пред пандемијата. По пандемијата и луѓето над 75 години забележаа помали подобрувања во нивото на благосостојба и депресија, веројатно поради „постојани ранливости“ како што се здравствени проблеми, побавна ментална адаптација на кризата и удар на нивниот социјален живот, велат истражувачите.
Студијата, сепак, има некои ограничувања. Речиси сите учесници беа бели, а околу половина беа пензионирани, што значи дека наодите можеби не ги одразуваат искуствата на другите групи.
И покрај тоа, наодите се во согласност со претходните истражувања кои покажуваат дека во Обединетото Кралство, задоволството од животот од раните 1980-ти, малку се зголемило. Лани, во годишниот извештај за светската среќа од Универзитетот во Оксфорд, кој го следи задоволството од животот на луѓето, ОК се рангираше на 20-тото место од 143 земји.
