Од октомври до декември 2025 година, во Македонија се изградени и регистрирани 1.004 нови станови, што е за 159 повеќе од претходниот квартал, покажува извештајот на Регистарот на цени и закупнини. Во Агенцијата за катастар се запишани и 27.522 листови за предбележување градба, што укажува на дополнителни објекти кои наскоро ќе се најдат на пазарот.
Најголема продажна цена на стан по метар квадратен е 182.404 денари (околу 3.000 евра) за стан од 83 м² во општина Центар. Најмногу станови се продадени во Аеродром (304), додека најмногу куќи се продадени во Битола (91). Продажбата на деловни простории е најзастапена во Центар (31 продажба), земјоделско земјиште и шуми во Куманово (110), а градежно земјиште во Ѓорче Петров (43).
Во четвртиот квартал се евидентирани 9.283 трансакции со недвижности, од кои 6.230 купопродажби (вклучувајќи продажби од инвеститори, држава и лицитации) и 3.053 закупи. Најмногу трансакции се регистрирани во Центар (812), Аеродром (645) и Штип (634). Најмалку трансакции имало во општините Пласница, Центар Жупа и Вевчани (4–5 трансакции).
Според Народната банка, цените на недвижностите во четвртиот квартал 2025 година бележат раст од 25% на годишно ниво, додека податоците на ДЗС покажуваат дека во ноември се издадени 304 одобренија за градење за изградба на 761 стан, најмногу во Скопскиот регион (427).
