Ова е прва официјална посета на сириски претседател во Белата куќа, шест месеци по нивната прва средба во Саудиска Арабија, и само неколку дена откако Вашингтон соопшти дека поранешниот член на Ал-Каеда повеќе не се смета за „специјално означен глобален терорист“.
Четириесет и двегодишниот Шара ја презеде власта минатата година, откако неговите исламистички борци започнаа брза офанзива од северозападниот дел на земјата и по неколкудневни борби, на 8 декември 2024 година, го соборија долгогодишниот претседател Башар ал-Асад.
Брз геополитички пресврт
Од тогаш, Сирија доживува драматична промена во надворешната политика, оддалечувајќи се од клучните сојузници на Асад – Иран и Русија, и приближувајќи се кон Турција, земјите од Заливот и САД.
Безбедносни договори и укинување санкции
Во фокусот на разговорите меѓу двајцата лидери, според најавите, ќе биде прашањето за безбедноста. САД посредуваат во преговори меѓу Сирија и Израел за можен безбедносен пакт, а според информации на „Ројтерс“, Вашингтон планира воспоставување воено присуство во воздушната база во Дамаск.
Очекувањата се дека Сирија ќе ѝ се приклучи на коалицијата предводена од САД во борбата против Исламската држава, а официјалната потврда би можела да биде објавена токму на состанокот во Белата куќа.
Неколку дена пред средбата, Трамп изјави пред новинарите дека е постигнат „голем напредок во однос на Сирија“, најавувајќи можен нов курс во американско-сириските односи.
Извор:Index.hr
