Цената на среброто за првпат во историјата ја надмина границата од 100 долари по унца, продолжувајќи го својот исклучително силен раст.
Вредноста на овој благороден метал минатата година порасна за речиси 150 проценти, а од почетокот на оваа година дополнително за околу 40 проценти, со што значително го надмина растот на златото.
Што го движи растот на цената?
Овој нагол скок е резултат на стабилен прилив на капитал во таканаречени „сигурни засолништа“, како и на силната индустриска побарувачка. Како последица на тоа, односот меѓу цената на златото и среброто се спушти на нешто над 50, што е најниско ниво од 2011 година.
Поголемата волатилност на среброто во споредба со златото – поради неговиот помал пазар и двојната улога како индустриски и инвестициски метал – дополнително ги засили неодамнешните ценовни движења.
Растот е поткрепен и од послабиот американски долар, пониски реални приноси и зголемен интерес за физички средства во услови на политичка неизвесност.
Дополнителен поттик дадоа и историскиот „short squeeze“ и силната побарувачка од мали инвеститори.
Индустриска побарувачка и ограничена понуда
Во исто време, индустриската побарувачка, особено од секторите на соларната енергија, електрификацијата и мрежната инфраструктура, создаде силен притисок врз физичкиот пазар, токму во период кога понудата од рудниците е ограничена.
Бидејќи поголемиот дел од среброто се добива како нуспроизвод при рударење на други метали, секторот не може брзо да реагира на растот на цените. Ова резултира со постојан дефицит, кој дополнително го поддржува растот на вредноста.
Потенцијални ризици
И покрај позитивните изгледи, ризиците не исчезнуваат. Позначително глобално економско забавување или подолготрајно задржување на екстремно високи цени би можело да доведе до пад на побарувачката, особено во индустриските сектори.
Дополнително, вродената волатилност на среброто значи дека се можни големи ценовни осцилации во двете насоки.
Изгледи за иднината и движењето на златото
Сепак, поширокиот контекст останува поволен. Силната индустриска побарувачка, дефицитот на физичкиот пазар и стабилниот интерес на инвеститорите и понатаму му даваат поддршка на пазарот.
Среброто во моментов истовремено има корист од растот на пазарот на благородни метали и од силата на индустрискиот сектор, ретка комбинација што го дефинира актуелниот циклус.
Во меѓувреме и златото бележи силен раст, приближувајќи се до клучното ниво од 5.000 долари по унца. Неговата цена годинава е зголемена за околу 14 проценти, поддржана од послабиот долар, ескалацијата на геополитичките тензии, континуираните купувања од страна на централните банки и зголемената загриженост околу независноста на американските Федерални резерви.
