Од јануари годинава изгореа повеќе од еден милион хектари, а само во Шпанија и Португалија штетата изнесува повеќе од две третини. Европските синдикати предупредуваат дека бројот на пожарникари низ Европа останува мал.
Новите податоци од Евростат покажуваат дека во 2024 година, ЕУ имала 390.600 професионални пожарникари, речиси 8% повеќе во споредба со 2023 година.
Германија, Франција, Полска, Италија и Шпанија вработуваат најголем број, помеѓу 42.100 и 61.700 пожарникари. Спротивно на тоа, Кипар, Данска, Литванија, Латвија и Финска имаат најмалку, со само 1.400 до 3.400 вработени.
Додека повеќето земји-членки го зголемија бројот на пожарникари, пет земји ги намалија своите сили – меѓу нив Шведска (-23%), Белгија (-10%) и Португалија (-6%).
„Срамно е што некои земји продолжуваат да го намалуваат бројот на пожарникари во време кога пожарите стануваат сè поголеми и ги загрозуваат животите и егзистенцијата на луѓето“, рече Естер Линч, генерален секретар на Европската конфедерација на синдикати (ETUC).
Пописот на пожарникарите во ЕУ не е едноставен бидејќи националните системи многу се разликуваат: Ирска речиси и да нема волонтери, додека Австрија се потпира на околу 200.000 волонтерски пожарникари поддржани само од неколку илјади професионалци.
Според синдикатите проблемот не е во привлекувањето или задржувањето на персоналот, туку во создавањето стабилни и платени работни места.
„Локалните и регионалните власти често наметнуваат драстични намалувања“, изјави портпаролот на Европската федерација на синдикати во јавниот сектор (EPSU).
Помеѓу 2022 и 2023 година, владите на ЕУ ги зголемија трошоците за противпожарни услуги за 8,5%, достигнувајќи 40,6 милијарди евра. Но, синдикатите велат дека тоа е далеку од доволно, со оглед на зголемените закани поврзани со климатските промени.
„Бидејќи пожарите и поплавите се почести поради климатските промени, не можеме да имаме буџети што стојат во место“, рече генералниот секретар на EPSU, Јан Виљем Гудрија.
„Сега е време значително да се зголемат јавните инвестиции во одржувањето на шумите, управувањето со водите, противпожарните служби и цивилната заштита, како и превенцијата“, додаде тој.
Во март 2025 година, Европската комисија презентираше подготвителна стратегија за подобро предвидување или спречување на кризи како што се природните катастрофи.
Стратегијата предвидува 30 мерки, од кои некои се однесуваат на управувањето со шумските пожари, но синдикатите предупредуваат дека нема доволно финансиска поддршка.
Во 2024 година, 20 земји-членки регистрираа области погодени од пожари над просекот. Затоа, синдикатите бараат големи инвестиции во професионални пожарникари, реформи што подобро би ја поврзале превенцијата и цивилната заштита, како и пренасочување на дел од средствата од фондовите за одбрана на ЕУ кон реагирање на кризи.
„Во последните две години, фокусот на цивилната заштита не беше на персоналот и работата на превенцијата“, напиша генералниот секретар на EPSU во писмо упатено до европскиот комесар за управување со кризи, Аја Лабиб, на 25 август.
„Потребно е повеќе земји-членки да ги зголемат своите капацитети и да не се потпираат само на пазарот во борбата против шумските пожари“, додаде тој.
