Совет на Европа предупредува дека медиумските слободи низ Европа се под траен и структурен притисок, а бројот на сериозни закани континуирано расте од 2015 година. Во најновиот извештај се наведува дека во 2025 година се регистрирани 330 сериозни случаи на загрозување на медиумските права.
Од нив, само околу една петтина биле успешно решени, а помалку од една третина довеле до конкретна реакција од страна на властите.
Политички притисок врз јавните медиуми
Во извештајот се наведува дека јавните медиуми во 11 од вкупно 32 анализирани земји се под силен политички притисок, меѓу кои и БиХ. Меѓу останатите земји се споменуваат Унгарија, Малта, Турција, Словачка, Италија, Хрватска, Полска, Грција, Србија и Романија.
148 новинари зад решетки
Особено загрижувачки е податокот дека во Русија, Азербејџан, Белорусија и Турција во затвор се наоѓаат вкупно 148 новинари. Во овие земји, обвиненијата за тероризам, екстремизам и загрозување на националната безбедност најчесто се користат како основа за нивно притворање.
Насилството врз новинари за време на протести најчесто е регистрирано во Грузија, Србија и Турција, а проблем претставуваат и т.н. SLAPP тужби – судски постапки насочени кон заплашување и финансиско исцрпување на медиумите.
Во извештајот се посочува и дека укинувањето на финансирањето од страна на Владата на САД за медиуми како Радио Слободна Европа, Гласот на Америка и проекти поддржани од USAID дополнително ја влошило медиумската состојба во повеќе европски земји.
Советот на Европа предупредува дека без системска заштита и политичка волја, медиумските слободи на континентот ќе продолжат да се влошуваат.
