На екстремните летни услови особено се чувствителни децата, постарите лица, бремените жени, луѓето со прекумерна телесна тежина, како и лицата со хронични заболувања – кардиоваскуларни, респираторни, дијабетес и други. Подеднакво се изложени и работниците кои се активни на отворено или во недоволно проветрени и расладени простории.
Што претставува топлотен бран?
Топлотниот бран е метеоролошка појава кога температурата е над 32°C најмалку три дена по ред, често придружена со зголемена влажност и намалена циркулација на воздухот. При овие услови, потењето се намалува, а телото троши повеќе енергија за да ја одржи нормалната телесна температура.
Можни здравствени проблеми
Високите температури можат да предизвикаат топлотен осип, грчеви, несвестица, па сè до сериозни состојби како сончаница и топлотен удар. Овие состојби можат да доведат до компликации, па затоа е важно да се реагира навреме.
Како да се заштитите?
- Избегнувајте престој на отворено меѓу 10 и 17 часот.
- Физичките активности извршувајте ги рано наутро, меѓу 4 и 7 часот.
- Носете лесна, широка облека од природни материјали во светли бои.
- Користете капа или шешир со широк обод и очила за сонце со UV заштита.
- Освежувајте се со млака вода – туширање или капење.
- Пијте доволно течности – вода, супи, млаки чаеви и свежо цедени сокови. Секогаш носете вода со себе!
- Јадете почесто, но помали и полесни оброци. Избегнувајте масна, солена и пржена храна, како и алкохол и засладени пијалаци.
- Доколку земате лекови, консултирајте се со лекар за нивното делување при високи температури.
Како да го расладите просторот?
- Температурата во просториите треба да биде под 30°C во текот на денот и под 24°C ноќе.
- Рано наутро проветрете, потоа затворете прозорци и спуштете ролетни на сончевата страна.
- Ноќе оставете прозорци отворени.
- Исклучете електрични уреди што не ги користите.
Внимание при користење возила
- Пред влегување во автомобил што стоел на сонце, отворете ги сите врати за да се проветри.
- Температурата во автомобилот нека биде неколку степени пониска од надворешната.
- Никогаш не оставајте деца или миленици сами во автомобил, дури ни во сенка!
Дополнителна грижа
- Учете ги децата и постарите лица како да се заштитат од жештините.
- Не шетајте миленици во најтоплиот дел од денот и внимавајте да имаат доволно свежа вода.
На крај, следете ги препораките на здравствените установи. Доколку вие или некој близок почувствува главоболка, вртоглавица, мачнина или потреба за повраќање по престој на сонце – веднаш побарајте лекарска помош.
Здравјето е најважно – заштитете се себеси и своите блиски во текот на летните горештини.Tools
