Медиумите контактираа со Жак Морети, сопственикот на кафулето „Ле Констелашн“, каде што избувна пожар на Нова Година, при што загинаа 47 лица, а речиси 120 беа повредени.
По трагедијата во кафулето „Ле Констелашн“ во познатиот швајцарски скијачки центар Кранс Монтани, во која најмалку 47 лица ги загубија животите, а речиси 120 беа повредени, сопственикот, Жак Морети, за прв пат проговори со медиумите.
Тој изјави за порталот 20 Minuten дека тој и неговата сопруга „не можат ниту да јадат ниту да спијат“ и дека се чувствуваат „многу лошо“. Затоа одби подолго интервју за медиумите, но потврди дека соработува со истражителите.
„Ќе направиме сè што е во наша моќ да помогнеме да се расветли причината за пожарот. Правиме сè што можеме. Вклучени се и нашите адвокати“, рече Морети.
Тој додаде дека „Ле Констелашн“ поминал три инспекции во последните 10 години и дека сè било „во согласност со прописите“.
Во кобните моменти, неговата сопруга била во кафулето. Таа добила изгореници на раката и била отпуштена од болница.
Главната швајцарска државна обвинителка, Беатрис Пилу, истакна дека сопствениците на кафулето биле испрашувани како сведоци. Бидејќи нивната кривична одговорност сè уште не може да се утврди, мерки на претпазливост како што се ограничување на движењето или забрана за напуштање на земјата не се покренати.
Патем, двојката Морети има бар за бургери во Кран-Монтана, додека водат огромен ресторан во Ленс, Франција.
