Звучи како сцена од бајка, но е сосема реално – за околу 830.000 евра (710.000 фунти), можете да поседувате цело село.
Тоа е модел, но не било каков модел: тоа е минијатурна детална верзија на шармантното рибарско село Полперо, кое се наоѓа на јужниот брег на Корнвол, кое се смета за едно од најубавите села во Англија.
Макетата на селото е направена во 1950-тите, во размер 1:24, и оттогаш е верна реплика на вистинското Полперо, со пристаниште за чамци, плажа, црква, десетици куќички, продавници, па дури и мини-верзија на самото село. Моделни едрилици „лебдат“ по „каналите“ на селото, а меѓу камените куќи и ридестите предели има фигурини на локални жители.
Оваа необична туристичка атракција привлекува илјадници посетители со години, а сега е на продажба за прв пат по долго време. Понудата вклучува и трособен стан со пространа кујна, две бањи и дневна соба, како и тераса со поглед на моделното село, совршено за уживање во текот на летните месеци.
Посебен дел од понудата е „Земјата на легендите“, област инспирирана од локалните легенди за пирати и шверцери од 19 век, како и детална минијатурна железница.
Билетите за оваа атракција моментално чинат околу 5 евра за возрасни, 3,5 евра за деца и 4 евра за постари посетители. А сега, со купувањето на ова необично место, купувачот добива и можност да живее и работи во рамките на уникатниот свет на минијатурното Полперо.
Затоа, тие 830.000 евра вклучуваат:
– целата минијатурна верзија на селото (модел со пристаниште, куќи, железница итн.),
- простор за посетители (изложбен дел),
– дополнителен амбиент за легенди и локален фолклор,
- и трособен стан со кујна, дневна соба и тераса, кој е поврзан со атракцијата и е наменет за живеалиште на сопственикот.
Агенцијата за недвижности што ја спроведува продажбата наведува:
- Дали некогаш сте сонувале да поседувате цело село? Па, сега можете, бидејќи моделот Селото во Полперо е повторно на пазарот за прв пат по многу години. Оваа прекрасна макета ги воодушевува посетителите и локалното население со децении.
А ако сте заинтересирани и вие всушност да го посетите ова село, Полперо е живописно и прометно село, со бројни кафулиња, ресторани и изобилство од свежа риба, вистинска дестинација за љубителите на морска храна и крајбрежен шарм.
