Како што објави Би-Би-Си, проблемот веќе предизвикува доцнења и откажувања на летови на глобално ниво.
Погодени се околу 6.000 авиони – половина од целата светска флота на „Ербас“. Освен најпродаваниот модел А320, под влијание на проблемот се и А318, А319 и А321. Британскиот воздухопловен регулатор предупреди дека ќе има „одредени нарушувања и откажувања“, иако засега влијанието врз аеродромите е ограничено.
Брза софтверска поправка за повеќето авиони, подолг застој за постарите
Околу 5.100 авиони ќе можат да се вратат во сообраќај по брза софтверска надградба што трае приближно три часа. Но кај околу 900 постари авиони ќе мора да се направи физичка замена на вградените компјутери, и тие нема да смеат да превезуваат патници додека ова не се заврши. Времето за поправките ќе зависи од достапноста на резервните делови.
Од „Ербас“ признаваат дека ситуацијата ќе предизвика „оперативни нарушувања за патниците и партнерите“ и се извинија за последиците. Според аналитичарката Сели Гетин, сценариото е „многу невообичаено“ и ќе зависи од стратегијата што ќе ја применат авиокомпаниите за надградба на софтверот.
Како реагираат авиокомпаниите?
Во Велика Британија, нарушувањата засега се умерени:
- Аеродромот Гетвик извести за „одредени проблеми“,
- Хитроу нема откажани летови,
- „Изиџет“ очекува нарушувања, но наведува дека голем дел од неговите авиони веќе ја завршиле надградбата.
Проблемите варираат од оператор до оператор. Според јавни податоци, „Ер Франс“ е најтешко погоден, со 50 откажани утрински летови од Париз. „Виз Ер“ и „Ер Индија“ веќе започнаа со имплементација на надградбите.
Во САД, проблемот се појави за време на викендот за Денот на благодарноста, еден од најпрометните периоди во годината. „Американ ерлајнс“ соопшти дека се засегнати 340 авиони и најави „одредени доцнења“, но повеќето надградби ќе бидат завршени до сабота. „Делта“ очекува минимални последици.
Во Австралија, нискобуџетниот превозник „Џетстар“ откажа 90 летови, откако третина од неговата флота се покажа како погодена. Нарушувања се очекуваат по целата земја.
Безбедноста останува приоритет
Директорот за политика во британската Агенција за цивилно воздухопловство, Тим Џонсон, предупреди дека известувањето од „Ербас“ може да значи доцнења и откажувања, но нагласи дека воздухопловството и понатаму е „еден од најбезбедните начини на патување“. Масовните приземјувања ги опиша како „исклучително редок настан“.
Британската министeрка за транспорт, Хајди Александер, рече дека влијанието врз британските авиопревозници е ограничено и дека е „охрабрувачки што проблемот е брзо идентификуван и што решението ќе биде имплементирано веднаш“.
Што точно го предизвика дефектот?
Проблемот е лоциран во дел од софтверот кој ја пресметува висината на авионот. „Ербас“ открил дека на големи надморски височини, податоците може да се нарушат од сончеви зраци со висока енергија, што повремено ги ослободува Сонцето.
Токму тоа доведе до инцидентот во октомври, кога авион на лет меѓу САД и Мексико одеднаш изгубил висина, при што биле повредени најмалку 15 лица. „Ербас“ инсистира дека ова е единствениот познат случај.
Европската агенција за безбедност во воздухопловството (EASA) издаде итна директива со која се бара сите авиони од погодените серии да го решат проблемот пред повторно да превезуваат патници. Дозволени се само „фери летови“ – летања без патници до сервисни центри.
Контрола преку компјутер – суштината на A320
Семејството авиони A320 е познато по системот „fly-by-wire“, во кој пилотските команди не се пренесуваат механички, туку преку електронски компјутерски сигнали. Токму поради оваа зависност од софтверот, целосната проверка и надградба се клучни пред повторно полетување.
Воздухопловните власти ширум светот продолжуваат внимателно да го следат развојот на ситуацијата.
Извор: Index.hr
