На 23 ноември 2025 година, скопската издавачка куќа PMGJazz го објави своето 58. албумско издание – дебитантското остварување „Addāt Fōyya“ на меѓународниот септет Солидариташ Оркестар. Овој нов проект го продолжува континуитетот на експерименталниот, истражувачки и интеркултурен џез, по кој PMGJazz веќе е препознатлив во регионалниот простор.
Септетот е предводен од Дени Омерагиќ и Нинослав Спировски, двајца од највлијателните претставници на современата македонска креативна џез сцена. Публиката ги знае како ко-автори и носечки фигури зад формациите „Светлост“ и „Одрон Ритуал Оркестра“ – проекти што од 2019 до 2024 година добија значајна меѓународна видливост, фестивалски покани и критички признанија.
Албумот „Addāt Fōyya“ е снимен во март 2025 во Будимпешта, а покрај Омерагиќ и Спировски како автори и изведувачи, на него учествуваат и четворица интернационални музичари кои му внесуваат силна урбана и глобална енергија на звукот. Тоа се: Кристофер Кокс (тромбон, САД), Давид Карла (саксофон и бас-кларинет, Литванија/Австралија), Виктор Капуши (саксофон), Петер Ајтаи (контрабас) и Атила Ѓарфаш (тапани)
Оваа поставеност го прави проектот типичен пример за современиот европски џез – отворен, интердисциплинарен и граден врз колективна изведувачка динамика.
„Addāt Fōyya“ ја продолжува соработката меѓу PMGJazz и издавачката куќа Inverted Spectrum Records, која функционира меѓу Анкара, Будимпешта и Белград и важи за куќа што поддржува авангардни и експериментални музички практики. Ова е нивна втора заедничка соработка и важен чекор за регионална промоција на независните џез артисти.
До крајот на 2025 година, PMGJazz најавува уште неколку нови изданија. Прво ќе биде објавен вториот албум „Inward“ од дуото Владан Дробицки и Глигор Кондовски, а веднаш потоа следи проектот „Aspirin Moon“ на Филип Букршлиев и Марија Грубор – уште две очекувани изданија кои ја потврдуваат продукциската динамика на етикетата.
„Addāt Fōyya“ е албум што не само што го збогатува македонскиот џез каталог, туку и го позиционира Солидариташ Оркестар како ансамбл што природно се движи низ европските сцени, со јасен стилски потпис, интензивен музички дијалог и силна авторска порака.
