Американската амбасада во Багдад беше цел на ракетен и дронски напад, кој безбедносните извори го опишуваат како најинтензивен од почетокот на американско-израелскиот конфликт со Иран.
Според ирачки извори, најмалку пет дронови и повеќе ракети биле лансирани од подрачја околу градот. Сведоци за Reuters изјавиле дека најмалку три дронови се движеле кон амбасадата, при што системот за противвоздушна одбрана C-RAM соборил два, додека третиот погодил дел од комплексот. Од објектот се издигале чад и пламен.
Жители на главниот град потврдиле дека се слушнала силна експлозија. Од американската амбасада засега нема официјална потврда, а комуникацијата била прекината.
Нападите доаѓаат во контекст на зголемени тензии во регионот. Проирански милитантни групи во Ирак ги засилија нападите врз американски цели како одговор на американско-израелските воздушни удари што започнаа на 28 февруари.
Претходно, групата Катаиб Хезболах објави дека е убиен нивен висок командант, додека Народните мобилизациски сили соопштија дека најмалку осум нивни борци загинале во воздушни напади во градот Ал Каим, во близина на границата со Сирија.
Ирачките безбедносни сили се распоредени низ Багдад, а т.н. Зелена зона – каде се наоѓаат владините институции и дипломатските мисии, вклучително и американската амбасада – е затворена.
Ситуацијата во регионот останува крајно напната, со зголемен ризик од нови напади и дополнителна ескалација.
