„Вкупно 80 жртви од авионската несреќа се идентификувани преку ДНК споредба. Од нив, телата на 33 жртви се предадени на семејствата“, изјави д-р Раџниш Пател за индиската агенција PTI, пренесе Hindustan Times.
Меѓу загинатите, потврдено е и телото на поранешниот премиер на индиската сојузна држава Гуџарат, Вијај Рупани, кој се наоѓал меѓу 242 патници и членови на екипажот на летот од Ахмедабад за Лондон.
Телата што се предадени на семејствата припаѓаат на жители на Ахмедабад, Вадодара, Кеда, Ботад и други места.
Во несреќата загинаа 241 од 242 лица кои се наоѓале во авионот, а дополнително се потврдени и 29 жртви на земја – откако авионот се урнал врз студентски дом за медицински работници веднаш по полетувањето.
Според информации на Reuters, истрагата за причините за несреќата е во тек. Ер Индија и индиските власти разгледуваат повеќе можни сценарија – проблеми со моторниот потисок, дефекти на закрилцата и фактот дека слетувачкиот систем на авионот бил во отворена положба во моментот на несреќата.
Авионот што се сруши бил модел Boeing 787-8 Dreamliner.
