Моќна снежно невреме парализираше голем дел од Соединетите Американски Држави, носејќи обилен снег, урагански ветрови, силни олујни удари и опасно ниски температури, особено во југоисточниот дел на земјата.
Според Националната метеоролошка служба на САД, системот со низок воздушен притисок долж источниот брег преку ноќ се развил во таканаречена експлозивна циклогенеза, позната и како „циклонска бомба“ – редок и исклучително моќен зимски феномен кој се засилува со огромна брзина.
Рекорден снег во Северна Каролина
Во сојузната држава Северна Каролина, количината на снег беше меѓу највисоките од почетокот на мерењата. До неделата наутро, во некои крајбрежни подрачја беа измерени повеќе од 25 сантиметри снег, додека во градот Шарлот тоа беше четвртиот најснежен ден во последните речиси 150 години.
Освен Северна Каролина, погодени се и Јужна Каролина, како и делови од Џорџија и Вирџинија.
Историски студ на Флорида
Уште подалеку на југ, по поминувањето на олујата, ладен арктички воздух донесе невообичаени временски услови. Метеоролозите пријавија нови температурни рекорди за февруари на Флорида, при што во некои подрачја температурите паднале под нулата, дури и во делови од јужна Флорида.
Според податоците на метеоролошката служба, вакви ниски температури таму не биле регистрирани од крајот на 1980-тите години.
Властите предупредија на животно загрозувачки услови, предизвикани од силниот студен ветер, кој дополнително го зголемува чувството на студ и значително го зголемува ризикот од хипотермија и смрзнатини.
Втора силна олуја по ред
Оваа олуја следи по уште еден бран на екстремен студ и обилни снежни врнежи од претходниот викенд, кога во неколку сојузни држави загинаа најмалку 85 луѓе.
Стотици илјади домаќинства сè уште се без електрична енергија и греење. Поради нови дефекти во електродистрибутивната мрежа, до неделата наутро повеќе од 150.000 домаќинства и компании останаа без струја, особено во Мисисипи и Тенеси.
Колапс во сообраќајот
Воздушниот сообраќај исто така е сериозно нарушен. Само во неделата биле откажани повеќе од 1.100 летови, откако во саботата веќе биле откажани околу 2.500 летови. Американските медиуми известуваат за бројни сообраќајни несреќи, како и за доцнења во испораките поради мраз и поледица.
