Обилните снежни врнежи во Полска предизвикаа сообраќаен метеж до 20 километри на автопатот помеѓу главниот град Варшава и балтичкиот пристанишен град Гдањск во текот на ноќта, соопшти полицијата.
Стотици луѓе беа заробени во своите автомобили во услови на мраз, но сообраќајот беше обновен до раните утрински часови. „Тешката ситуација започна вчера по 16 часот, кога првите камиони на рутата S7… почнаа да имаат проблеми при приближувањето кон падините“, рече Томаш Марковски, портпарол на полицијата во северниот град Олштин.
„Ова доведе до сообраќаен метеж долг приближно 20 километри преку ноќ“, додаде тој.
Заменик-министерот за инфраструктура Станислав Буковиец на прес-конференција изјави дека никој не е повреден во овие услови. Ана Карчевска, портпаролка на полицијата во Острода, изјави дека полицајците се обиделе да им помогнат на возачите кои биле заглавени.
Острода се наоѓа на автопатот, околу 40 километри западно од Олштин. „Помогнавме колку што можевме, а на возачите им понудивме кафе и топол чај подготвени за нас од Градското собрание на Острода“, забележа таа.
Државната новинска агенција ПАП објави дека имало прекини и во железничкиот сообраќај и на аеродромите, но дека транспортните услуги се враќаат во нормала.
